Փաստ ինֆո

Պաշտպանության բանակ զորակոչված և զինհոսպիտալում մահացած նորակոչիկ Նորայր Սահակյանի գործով այսօր դատարանը որոշեց հրապարակել վկա Արման Գրիգորյանի նախաքննական ցուցմունքը:

Նշենք, որ սահմանային ծառայություններից դատարանը գրություն էր ստացել, որ վկան 22. 06. 2014թ. մեկնել է Հայաստանից և դեռևս չի վերադարձել:

Մեղադրողը գտավ,  որ դատարանը բոլոր միջոցները ձեռնարկել է վկային դատարան հրավիրելու և հարցաքննելու համար, ուստի միջնորդեց հրապարակել վկայի նախաքննական ցուցմունքները: Մինչդեռ  պաշտպանական կողմն այլ կարծիքի էր: Փաստաբանի դիտարկմամբ` վկայի բացակայելը դեռ չի նշանակում, որ դատարանը ձեռնարկել է բոլոր միջոցները դատական նիստին նրա ներկայությունն ապահովելու նպատակով, և պաշտպան Գեղամ Հակոբյանը միջնորդեց վկային հանել դատակոչի ցուցակից:

Սակայն դատարանը  որոշեց, որ այս վկայի ցուցմունքը միակ վճռորոշ ապացույցը չէ, ուստի հրապարակեց նախաքննական ցուցմունքը: Պարզվեց, որ վկան  2012թ. դեկտեմբերի 21-ին ուղեկցել է նորակոչիկներին և նախաքննության ընթացքում հայտնել, որ տվյալ օրը հավաքակայանից 2 ավտոբուսով ընդհանուր թվով 84 նորակոչիկներ  ուղևորվել են ՊԲ N զորամաս:

Ըստ վկայի՝  հավաքակայանից դուրս գալիս նորակոչիկներից  ոչ ոք չի գանգատվել:

Իսկ ճանապարհին  նորակոչիկներից մեկը վկային հայտնել է, որ իր կողքին նստած նորակոչիկը՝  Նորայր Սահակյանը վատ է զգում իրեն:

Նորայրը ջերմել է, Արման Գրիգորյանը նրան տեղափոխել է և նստեցրել ավտոբուսի դիմացի հատվածում:  Ճանապարհին ավտոբուսը մի քանի անգամ կանգ է առել, նորակոչիկները հոգացել են իրենց բնական կարիքները: Այդ ժամանակ պարզվել է, որ Նորայրը սրտխառնոց ունի և միայն փսխելուց հետո ասել է, որ ինքնազգացողությունը փոքր-ինչ լավ է:

Վկան իր ցուցմունքում նշել է, որ զորամաս ուղևորվելու ճանապարհին Նորայրն այլև չի գանգատվել, իսկ արդեն զորամասում պարզվել է, որ 2 նորակոչիկ իրենց վատ են զգում, այդ թվում՝ նաև Նորայրը, և նրանք տեղափոխվել են հոսպիտալ:

Հաջորդ օրը վկան  տեղեկացել է,  որ  Նորայրը մահացել է:

Դատարանն այսօր պատշաճ կերպով ծանուցված, սակայն նիստին չներկայացած վկա Կարեն Վարդանյանի նկատմամբ բերման որոշում  կայացրեց:

Հաջորդ դատական նիստը տեղի կունենա 2015թ. հունվարի 20-ին: