Փաստ ինֆո

«Մենք գույքագրել ենք ասպարեզում եղած բոլոր խնդիրները: Դրանք շատ բարդ են ու բազմազան»,- ամփոփելով 2014թ. իր ղեկավարած ոլորտում կատարված աշխատանքները՝ ասաց քաղաքաշինության նախարար Նարեկ Սարգսյանը՝ միաժամանակ նշելով, որ հատկապես կարևորվել է տարածքային համաչափ զարգացման խնդիրը:

Նախարարը հայտնեց նաև, որ նախարարությունն առաջին անգամ այս տարի իր վրա է վերցրել պետական կարիքներից տուժածների խնդիրների լուծումը: Որոշ հարցերի շուրջ արդեն իսկ լուծումներ են մշակվել:

Իրացման գոտիների բնակիչների հետ հանդիպումների արդյունքում որոշվել է հաջորդ տարի լուծել Ֆիրդուսի փողոցի բնակիչների փոխհատուցման հարցը:

«Պետական փորձաքննություն քաղաքաշինության բնագավառում մինչ այժմ ՀՀ-ում գոյություն չի ունեցել»,- ասաց Նարեկ Սարգսյանը՝ նշելով, որ որոշում է կայացվել առաջիկայում այդ բացը վերացնելու նպատակով ստեղծել փորձաքննության կոնտրոն:

Նախարարությունը նաև օրենսդրական նախաձեռնությամբ փորձ է արել լուծել Երևանի կենտրոնի անկանոն կառուցապատման հարցը: Նարեկ Սարգսյանի խոսքով՝ մշակվել են հստակ չափորոշիչներ՝ խտության, կանաչապատման վերաբերյալ:

Իսկ ընդհանուր առմամբ անցնող 2014-ը Նարեկ Սարգսյանը անվանեց «պրոբլեմների հաշվառման փուլ», իսկ 2015 թվականից կմեկնարկի արդեն «իրագործման փուլը»:

«Երևանի քանդված շենքերը, տասնյակ հուշարձանները Նարեկ Սարգսյանի հետ կապ չունեն: Ես այդ տարիներին չեմ աշխատել»,- այսօր լրագրողների հետ հանդիպման ժամանակ, հակադարձելով իր հասցեին հնչող մեղադրանքները, թե ինքը Երևանի թիվ մեկ թշնամին է, ասաց քաղաքաշինության նախարար Նարեկ Սարգսյանը՝ միաժամանակ այդ կարծիքները որակելով «մերկապարանոց մեղադրանքներ»:

Նարեկ Սարգսյանը նշեց, որ առաջին անգամ է հրապարակավ խոսում այդ հարցի մասին:

«Հազար անգամ կրկնված սուտը հավասար է ճշմարտության»,- ասաց Նարեկ Սարգսյանը՝ մեջբերելով Գերմանիայի ռեյխի հայտնի դեմքերից մեկի խոսքերը,- այն ամենը, ինչ տասնյակ տարիներ գրվել ու վերագրվել է ինձ, ես բազմիցս ասել եմ, որ սուտ է»:

Անդրադառնալով մեղադրանքներից կոնկրետ մեկին՝ Հյուսիսային պողոտայի կառուցապատմանը, քաղաքաշինության նախարարը կարծիք հայտնեց, որ «Հյուսիսային պողոտայի կառուցումը Հայաստանի արդի ճարտարապետության մեջ ամենանշանակալի պրոյեկտն է» և հիշեցրեց, որ պողոտայի տարածքում արևելյան հետնախորշերով տարածք էր, որ մնացել էր 70 տարի:

Ներկ Սարգսյանը նաև հիշեցրեց, որ ժամանակին նման վերաբերմունքի են արժանացել բոլոր խոշոր նախագծերը:

«Օպերայի շենքի ժամանակ էլ խնդիր է եղել: 3-4անգամ դադարեցրել են շինարարությունը»,- ասաց նա՝ հավելելով, որ դժվարությամբ են ընդունվել նաև Սայաթ-Նովա, Բաղրամյան պողոտաները:

Անդրադառնալով լրագրողների մեղադրանքներին՝ Նարեկ Սարգսյանը մեջբերեց Չերչիլի խոսքերը՝ «լրագրողներին ավելի հեշտ է լռեցնել, քան բարիացնել»: