Փաստ ինֆո

2015 թվականին էլ ՀՀ փաստաբանների պալատն աշխատանքներ է տանելու՝ կոռուպցիոն ռիսկերի մեջ ներգրավված փաստաբաններին բացահայտելու և նրանցից ազատվելու ուղղությամբ: Այսօրվա մամուլի ասուլիսում այս մասին հայտարարեց   ՀՀ փաստաբանների պալատի նախագահ Արա Զոհրաբյանը՝ ամփոփելով անցնող տարվա ընթացքում կատարված աշխատանքները ու ներկայացնելով նախանշված անելիքները:

Փաստաբանական համայնքի ինքնամաքրման գործընթացն իրականացել է նաև այս տարի. մեկ փաստաբան զրկվել է արտոնագրից՝ քննիչի կանչով ներկայանալու ու պատշաճ ծառայություններ չմատուցելու համար: Ընդհանուր առմամբ երեք փաստաբան զրկվել է արտոնագրից:  

«2015 թվականին մեր առաջ խնդիր ենք դրել լուծել կոռուպցիայի հետ կապված խնդիրները: Գիտենք այն փաստաբաններին, ովքեր միջնորդությամբ են զբաղվում, նրանք մշտապես մեր ուշադրության տակ են»,- ասաց Արա Զոհրաբյանը՝ պարզաբանելով, որ կոռուպցիայի առկայությունն ինքնին ապացուցելը շատ դժվար է:

«Օրինակ՝  մեզ է դիմել մի քաղաքացի, և նա պատրաստ է նաև կաշառքի մասին հաղորդում տալ, բայց երբ հասկացավ, որ դա կարող է իր համար խնդիր առաջացնել, քաղաքացին առանց անուններ տալու դուրս եկավ»:

Քրեական օրենսգրքում փոփոխություններ են արվել, որոնք գործում են արդեն 2 տարի, Փաստաբանների պալատն առաջարկելու է, որ կրկին գործի նախկին մոդելը, այսինքն՝ հաղորդում տված անձն ազատվի պատասխանատվությունից: Ըստ գործող օրենքի՝ նա ազատվում է պատասխանատվությունից, եթե կաշառքը տեղի է ունեցել շորթման միջոցով և եթե դրանից 3 օրվա ընթացքում անձն այդ մասին հայտնել է իրավապահ մարմիններին:

«Այսինքն՝ եթե նա 4-րդ օրվա ընթացքում հաղորդում տա, նրան մեղադրելու են կաշառք տալու մեջ»,- նշեց Արա Զոհրաբյանը:

ՓՊ նախագահը հայտնեց, որ 2014թ. տվյալներով՝ նախորդ տարվա համեմատ շուրջ 55%-ով ավելացել է Փաստաբանների պալատում  հարուցված կարգապահական գործերի թիվը՝ 140՝ նախորդ տարվա 90-ի դիմաց: Շուրջ 80%-ով ավելացել են նաև փաստաբանների նկատմամբ քաղաքացիների բողոքները՝ 173՝ 96-ի դիմաց:

Ի պատասխան հարցերի՝ Արա Զոհրաբյանը ներկայացրեց իր տեսակետը նաև ՓՊ-Վճռաբեկ դատարան հակասությունների շուրջ՝  ՓՊ նախագահն ընդգծեց, որ հարցն այն չէ, որ Վճռաբեկ դատարանը պետք է քննի անխտիր բոլոր բողոքները, այլ սահմանի հստակ չափորոշիչներ, թե ինչ պատճառաբանություններով են վարույթ ընդունվել այս 5 բողոքները և ոչ թե՝ այն 5 բողոքները:

Ըստ Արա Զոհրաբյանի՝ բացի այդ,Վճռաբեկ դատարանում պետք է փոխվի մտածողությունը, ինչին կարելի է հասնել՝ Վճռաբեկ դատարանը երիտասարդ կադրերով համալրելու ճանապարհով:

ՓՊ նախագահը նշեց, որ դատական գործերի շրջանակում փաստաբանների հանդեպ ագրեսիվ վերաբերմունքը նորություն չէ, պարզապես լուրերն այժմ ավելի արագ են տարածվում:

Արա Զոհրաբյանը նշեց, որ մի կողմից փաստաբանները պետք է նրբանկատ ու զուսպ լինեն, մյուս կողմից էլ՝ պետական պաշտոնատար անձը, մասնավորապես՝ դատավորը, անգործություն չդրսևորի, որպեսզի ռեպլիկները չվերաճեն վիրավորանքների ու հայհոյանքների, ապա նաև՝ ձեռնամարտի:

Լուսանկարը՝ Ֆոտոլուրի