Փաստ ինֆո

Հայաստանի անդամակցությունը ԵՏՄ-ին դեռևս չի նշանակում, որ Հայաստանը դրա շրջանակներում իր  հարաբերությունները պետք է զարգացնի Եվրամիության և ԱՄՆ-ի հետ հարաբերությունների հաշվին:

Ամփոփելով քաղաքական տարին ու ներկայացնելով քաղաքական զարգացումների մասին իր դիտարկումները՝ լրագրողների հետ այսօրվա   հանդիպմանը այս մասին նշեց «Եվրոպական ինտեգրացիա» ՀԿ փորձագետ Մանվել Ղումաշյանը:

Ըստ նրա՝ 1-2 տարի անց Ռուսաստան-Արևմուտք լարվածությունը կթուլանա, և Հայաստանը կվերսկսի իր «և, … և» քաղաքականությունը՝ և Եվրամիության ու Արևմուտքի, և Ռուսաստանի հետ:

«Այսինքն՝ այն, ինչ փաստացի անում են Բելառուսն ու Ղազախստանը, «Հայաստանն էլ է անում»,- ասաց փորձագետը՝ վկայակոչելով, մասնավորապես, Հայաստանի ու ԱՄՆ-ի միջև վիզային ռեժիմի հեշտացման գործընթացը:

«Հայացք» կիրառական քաղաքականության և հետազոտությունների վերլուծական կենտրոնի  փորձագետ Լիանա Հովհաննիսյանը  նկատեց, որ թեև տեսակետ կար, որ ԵՏՄ անդամակցությամբ Արևմուտքի դռները փակվում են, սակայն պատկերն, ըստ փորձագետի, այդքան սև ու սպիտակ չէ, Արևմուտքը, մասնավորապես՝ ԱՄՆ-ն, հետաքրքրված են Հայաստանով: Այդ մասին հայտարարեց նաև ԱՄՆ արտակարգ ու լիազոր դեսպան Ջոն Հեֆֆերնը իր հրաժեշտի ասուլիսում:  

Փորձագետները գտնում են, որ դա ֆորմալ, դիվանագիտական հայտարարություն չէր. միայն Որոտանի ՀԷԿ-ի նախագիծը բավական է, որպեսզի ԱՄՆ-ն հետաքրքրված լինի Հայաստանով:

Լիանա Հովհաննիսյանը գտնում է, որ հաջորդ տարի Արցախի խնդիրը կլինի այն հատման կետը, որի շուրջ ընդհանուր հայտարարի կգան  ԵԱՀԿ Մինսկի խմբի համանախագահները, և ԱՄՆ-ի  ու Ռուսաստանի համագործակցությունն այդ խնդրի շուրջ 2015թ. կդառնա մոդելային օրինակ:

Մանվել Ղումաշյանն իր հերթին ընդգծեց, որ ղարաբաղյան խնդրի բանակցային գործընթացում կտրուկ փոփոխություններ չեն լինի՝ մինչև որ կհարթվեն ԱՄՆ-Ռուսաստան հարաբերությունները:

Փորձագետը նշեց, որ հասարակության մեջ, Ռուսաստանի աղետալի տնտեսական վիճակով պայմանավորված, առկա են հոռետեսական տրամադրություններ՝ Հայաստանի ԵՏՄ-ին անդամակցության շուրջ, դրանք, ըստ նրա, չէին լինի, եթե ԵՏՄ անդամակցության գործընթացը սկսվեր տասը տարի առաջ, ասենք՝  2004թ.:     
    
Ռուս-թուրքական հարաբերությունների զարգացման մասին Ռուսաստանի հայտարարություններին փորձագետը թերահավատ է վերաբերվում, առհասարակ Ռուսաստանի հետ հարաբերությունները հուշագրային մակարդակով են ընթանում՝ Ռուսաստանի ոչ կայուն վիճակից ելնելով:

Լիանա Հովհաննիսյանը որպես արկածախնդրություն ու միամտություն բնութագրեց Ռուսաստանի հանդեպ ԱՄՆ քաղաքականությունը՝ Ուկրաինայի հարցում: Ակնհայտ էր, ըստ փորձագետի, Ուկրաինան այն կարմիր գիծն է, որից  ներքև Ռուսաստանը չէր կարող գնալ:

Ըստ նրա՝ ավելի դրական էին զարգացումները Իրանի միջուկային ծրագրի հարցում՝ թեև ԱՄՆ-ն ու Իրանը համաձայնության չեկան, սակայն բանակցությունների ժամկետը վեց ամսով երկարացվեց և հաջորդ տարի կնվազի կողմերի միջև առկա լարվածությունը:

Լուսանկարը՝ Armnews-ի