Փաստ ինֆո

ՀՀ քրեական օրենսգրքի 3 հոդվածներով մեղադրվող 31-ամյա Հրանտ Հարությունյանը և 26-ամյա Բեգլար Հովհաննիսյանը մասնակի արդարացվեցին։ Մասնավորապես՝ դատարանը երկու հոդվածներով նրանց արդարացրեց, իսկ մեկով՝ դատապարտեց 6-ական տարվա ազատազրկման:

Ավան և Նոր-Նորք վարչական շրջանների ընդհանուր իրավասության դատարանի դատավճռով՝ ամբաստանյալներն արդարացվեցին  սպանության փորձի եւ ապօրինի զենք պահելու համար ՀՀ քրեական օրենսգրքի  34-104-րդ և 235-րդ հոդվածների 1-ին մասերով առաջադրված մեղադրանքներում։

Սակայն մեղավոր ճանաչվեցին 258-րդ հոդվածի 4-րդ մասով՝ խուլիգանությունը, որը կատարվել է զենքի կամ որպես զենք օգտագործվող առարկաների գործադրմամբ և դատապարտվեցին 6 -ական տարվա ազատազրկման:

Նախաքննական մարմնի վարկածով՝ Հրանտ Հարությունյանը, ապօրինի ձեռք բերած և իր մոտ պահվող հրազեն հանդիսացող «Մարգոլին ՄՑՄ» տեսակի ատրճանակի գործադրմամբ, կատարել է խուլիգանություն և սպանության փորձ` 2 անգամ կրակելով Արմեն Սիմոնյանին՝ առողջությանը պատճառելով միջին ծանրության վնաս:

Իսկ Բեգլար Հովհաննիսյանին մեղադրանք է առաջադրվել ապօրինի ձեռք բերած և իր մոտ պահվող «Մակարով» տեսակի ատրճանակից Տավուշի մարզի Բերդ քաղաքի բնակիչ Անուշավան Մանուչարյանի նկատմամբ սպանության փորձ անելու, ինչպես նաև՝ զենքի գործադրմամբ խուլիգանություն կատարելու մեջ:

Նշենք նաև, որ տուժող Արմեն Սիմոնյանը դատաքննության ընթացքում տված ցուցմունքում հայտարարել էր, թե երիտասարդներին չի ճանաչել,  և որ նրանք իրեն սպանելու ցանկություն չեն ունեցել, այլապես կսպանեին, քանի որ դրա հնարավորությունն ունեցել են:

Բացի այդ, եթե իր նկատմամբ ոտնձգություն լիներ, ապա իրավապահ մարմիններին չէր հայտնի, քանի որ «սովոր է իր հարցերը ինքնուրույն լուծել»:

Տուժողը հայտնել էր նաև, որ գործով մյուս տուժողը հանդիսանում է իր քեռու թոռը: