Փաստ ինֆո

«Արաբկիր» բժշկական համալիրում 2,5 տարեկան Լիա Միսակյանի մահվան պատճառը եղել է  օրգանիզմի ընդհանուր ինտոքսիկացիան,  որն էլ հետևանք է արտահայտված աջակողմյան թարախաֆիբրինային պլևրոպնևմանիա, նշիկաբորբի հետևանքով զարգացած բարդության: Այս կարծիքին է դատաբժշկական փորձաքննությանը մասնակցած փորձագետը, ով այսօր հրավիրվել էր Երևանի Արաբկիր և Քանաքեռ-Զեյթուն վարչական շրջանների ընդհանուր իրավասության դատարան` եզրակացության շուրջ հարցաքննության:

Դատական նիստում փորձագետը մանրամասնեց, որ  նման տիպի  թոքաբորբը ունի 4 փուլ,  երեխայի մոտ եղել է 3-րդ փուլը, որն սկսել է զարգանալ մահվանից  4-6 օր առաջ, այսինքն՝ երեխայի մոտ հիվանդությունը սկսել է զարգանալ 2012թ. դեկտեմբերի 29-ին: Դիակի դատաբժշկական փորձաքննությունը կատարվել է 2013թ. հունվարի 2-ին,  երեխայի մահվանից ժամեր անց:

Փորձագետը բացառեց հիվանդության կայծակնային զարգացումը: Ըստ նրա՝ թարախի և ֆիբրինի զարգացման համար ժամանակ է հարկավոր: Ավելին` նա տգետ անվանեց բոլոր այն փորձագետներին, ովքեր գտել են, որ երեխայի մոտ ագրանուլոցիտոզ է եղել:

Դիակի դատաբժշկական փորձաքննությամբ պարզվել է նաև, որ երեխայի աջակողմյան պլևրալ խոռոչում 300 գրամ կիսաթափանցիկ սպիտակադեղնավուն հեղուկ  է եղել, թե այդ հեղուկը որքա՞ն ժամանակում է գոյացել, շատ է եղել, թե՞ քիչ` փորձագետը դժվարացավ պատասխանել` նշելով,  որ հեղուկը չի ուսումնասիրվել, քանի որ դրա կարիքը չի եղել:

Պաշտպանական կողմը արձագանքեց, թե մի շարք կարևոր հետազոտություններ, որոնք պետք է կատարվեին` չեն կատարվել:

Փորձագետը նշեց,  որ դիակի դատաբժշկական փորձաքննության ժամանակ երեխայի թոքերից 2 կտոր է վերցվել` նշելով, որ  այդքանը բավարար է եղել փորձաքննության համար: Ըստ ամբաստանյալ Զարինե Այվազյանի պաշտպան Երեմ Սարգսյանի` ՀՀ Առողջապահության նախարարի համապատասխան հրամանով պարտադիր է 5 կտորը:

Ամբաստանյալ Լիլիթ Վարդանյանի պաշտպան Գիվի Հովհաննիսյանը հրաժարվեց փորձագետին հարցեր ուղղել` նշելով, որ փորձագետը եկել է ոչ թե իր տված փորձաքննության եզրակացության շուրջ պարզաբանումներ տալու,  այլ «պահելու» նույն հիմնարկի ղեկավարության կողմից տրված փորձաքննության եզրակացությունը: 

Դատաքննությունը լրացնելու մի քանի միջնորդություններ,  որոնք ներկայացրեցին կողմերը՝ դատարանը մերժեց:

Ամբաստանյալ Զարինե Այվազյանի պաշտպան Երեմ Սարգսյանն էլ միջնորդեց դատական նիստը հետաձգել և իրեն ժամանակ տրամադրել ևս մեկ անգամ դատական նիստի ձայնագրառումը լսել:

Հաջորդ դատական նիստը տեղի կունենա 2015թ. հունվարի 27-ին: