Փաստ ինֆո

Հայաստանի հունահռոմեական ոճի ըմբշամարտի հավաքականի գլխավոր մարզիչ Լեւոն Ջուլֆալակյանն armsport.am-ի հետ զրույցում խոսեց ավարտվող տարում ընտրանու գրանցած հաջողությունների եւ առաջիկա ծրագրերի մասին:

- Պրն Ջուլֆալակյան, 2014 թվականը հունահռոմեական ոճի ըմբիշների համար անշուշտ լավ ստացվեց. աշխարհի ու Եվրոպայի չեմպիոնություններ, փոխչեմպիոններ, բացի այդ էլ մի քանի մրցաշարերում հաջող մրցելույթներ. ըստ Ձեզ ո՞րն էր հաջողությունների գլխավոր նախապայմանը:

- Մեր հաջողություններն առաջին հերթին եղան ըմբիշների աշխատասիրության եւ ճիշտ մոտեցման շնորհիվ: Տղաներն իսկական պրոֆեսիոնալների նման գործեցին եւ եղան սպասված չեմպիոնությունները: Մենք նաեւ լավ էինք նախապատրաստվել թե՛ Եվրոպայի, թե՛ աշխարհի առաջնություններին:

- Տաշքենդում կայացած աշխարհի առաջնությունից անմիջապես հետո Դուք նշեցիք, որ հավաքականը կաղում է 1-2 քաշային կարգերում, մասնավորապես՝ 130 կգ. այժմ ի՞նչ քայլեր են ձեռնարկվել ըմբիշների որակներին դրական կերպով ազդելու համար:

- Մեր ազգում իսկապես մարմնով խոշոր անձանց պակաս կա: Այստեղ մնում է միայն ժողովրդին խնդրել, որ խոշոր երեխաներ ծննդաբերեն (ժպտում է,- խմբ.):

- Պատրաստե՞լ եք արդեն հավաքականի՝ հաջորդ տարվա համար նախատեսված օրացուցային պլանը:

- Այո, արդեն պատրաստ է. հունվարի 23-ից 25-ը լինելու է Հայաստանի առաջնությունը, որին կհաջորդեն հավաքներն ու մրցաշարերին նախապատրաստությունները: Գալիք տարում մեր հիմնական նպատակն աշխարհի առաջնությունն է, որը վարկանշային է Օլիմպիադայի համար:

- Դեկտեմբերի 21-ին ԱՄՆ-ում Արսեն Ջուլֆալակյանի տարեվերջյան գոտեմարտն է Կայլ Դեյկի հետ. ըստ Ձեզ՝ նա ի՞նչ մարզավիճակով ու շանսերով է մոտենում գոտեմարտին:

- Արսենը յուրաքանչյուր մենամարտի նախապատրաստվում է մաքսիմալ մարտական եւ բացառապես հաղթանակի ձգտումով: Նա բազմիցս ապացուցել է իր զորությունն ու պատահական չէ, որ հենց իրեն են ընտրել այդ գոտեմարտի համար: Նա հիանալի մարզավիճակում է եւ ինքս հուսով եմ, որ շատ լավ գոտեմարտ կացկացնի:

- Ձեր դիտանկյունից Արթուր Ալեքսանյանի եւ Արսեն Ջուլֆալակյանի՝ Բունդեսլիգայում հանդես գալը որքանո՞վ է օգնում իրենց:

- Բունդեսլիգայում հանդես գալը նրանց համար միմիայն դրական նշանակություն ունի: Այն շատ լավ համապատասխան է իմ կազմած պլանի հետ եւ ոչ մի կերպ չի խանգարում: Ըմբիշները ֆինանսապես շահելուց զատ նաեւ իրենց մարզավիճակն են պահպանում:

 - Այժմ ընթացող ծաղկաձորյան հավաքի մասին...

- Ներկա հավաքը նախատեսված է մինչեւ դեկտեմբերի 25-ը: Բոլոր պայմանները հիանալի են, իսկ մարզումներն ընթանում են բնականոն հունով: