Փաստ ինֆո

«Այն, ինչ մենք այս մեկ շաբաթվա ընթացքում տեսանք, դա աննախադեպ թռիչք էր: Բնական է, որ ներկրողը չի կարող միայն մեծ կորուստներ ունենալով զսպել իր գնաճը»,- լրագրողների հետ ճեպազրույցում այսօր ասաց Հայաստանի արդյունաբերողների և գործարարների միության նախագահ Արսեն Ղազարյանը:

«Ազատ շուկա ենք, պետության գործառույթներն այդքան էլ խիստ չեն, և շուկան նման դեպքերում խաղում է»,- ասաց նա` հավելելով, որ շուկայում բավական շատ են սպեկուլյատիվ երևույթները: Արսեն Ղազարյանը նշեց, որ սպեկուլյացիան ավելի շատ իրականացվում է տարադրամի փոխանակման կետերում, փոխարժեքի «սև» շուկայում: Իսկ բանկերը երեկվանից սկսել են ազատ վաճառքը:

Այդուհանդերձ, Արսեն Ղազարյանը հույս հայտնեց, որ փոխարժեքի շուկան առաջիկայում կկարգավորվի,գնաճն էլ կմեղմվի:

Ավելին` Արսեն Ղազարյանի խոսքով, ԿԲ նախագահի երեկվա ելույթն արդեն արդյունք է տվել` մի քանի ժամվա ընթացքում երեկ դրամն արժևորվել է ու այսօր էլ շարունակում է արժևորվել:

Լրագրողների այն հարցին, թե հնարավո՞ր է իրավիճակի բարելավմանը նպաստած լինի նաև այն, որ ԿԲ նախագահը երեկ ԱԺ-ում հարցը քննարկել է գործարար-պատգամավորնրի հետ, Արսեն Ղազարյանը պատասխանեց. «Ժամանակին նրանք բիզնեսմեններ էին, որոնք հիմա քաղաքական գործիչներ են: Օրենքով տնտեսվարողներ չեն, նրանք մաքսիմում կարող են լիազորված փայեր ունենան»:

Լրագրողները փորձեցին իմանալ նաև Արսեն Ղազարյանի կարծիքը, թե  կպատժվի՞ արդյոք Սամվել Ալեքսանյանը, ով կտրուկ բարձրացնում է շաքարավազի գինը` հաշվի առնելով այն հանգամանքը, որ վարչապետն այսօր հատուկ անդրադարձավ շաքարավազի և ալյուրի գնի անհիմն բարձրացման խնդրին:

«Նախ՝ Սամվել Ալեքսանյանն ինքը գործարար չէ, իր հիմնած համակարգն է աշխատում: Թող Շաբոյանն ուսումնասիրի և ասի: Համակարգը իրավունք չունի դեպուտատին պատժի»,- ընդգծեց նա: