Փաստ ինֆո

Առանձնապես խոշոր չափերի փողերի լվացման ու խարդախության գործով դատական նիստում երկու ամբաստանյալների պաշտպան Հակոբ Ճարոյանն այսօր մեղադրողին բացարկի միջնորդություն ներկայացրեց:

Ըստ պաշտպանի՝ մեղադրող Արմեն Փանոսյանը հաստատել է ակնհայտ անհիմն մեղադրական եզրակացություն՝ իր պաշտպանյալներն անմեղ են:

Ըստ նրա՝ 45 վկաների ցուցմունքներով չի ապացուցվում մեղադրանքը, նրանց դատարան հրավիրելով ու հարցաքննելով դատավարությունը ձգձգվելու է և խախտվելու ողջամիտ ժամկետում դատաքննությունն անցկացնելու պահանջը:

Մեղադրանքի կողմը նկատեց, որ ապացույցները դեռևս չեն էլ հետազոտվել, իսկ մեղադրող Արմեն Փանոսյանն իր հերթին գտավ, որ պաշտպանի միջնորդությունն ակնհայտ անհիմն է. ինքը հաստատել է մեղադրական եզրակացությունը, քանի որ ի տարբերություն պաշտպանի՝ գտել է, որ, մասնավորապես, վկաների ցուցմունքներն ունեն ապացուցողական նշանակություն:
Դատարանը մերժեց միջնորդությունը:

Այսօրվա դատական նիստը հետաձգվեց ամբաստանյալ Մելիք Եսայանի վատ ինքնազգացողության պատճառով: Ըստ ամենայնի, հաջորդ դատական նիստում բացարկների մարտավարությունը կշարունակվի:
   
Ըստ մեղադրանքի՝ 2006 թվականի օգոստոսի 21-ից մինչև 2013 թվականի հոկտեմբերի 01-ը ներառյալ ժամանակահատվածում «Հայբիզնեսբանկ» ՓԲ ընկերության Վարչության նախագահ աշխատած Արա Կիրակոսյանը գործել է կազմակերպության շահերին հակառակ՝  իր և ուրիշ անձանց օգտին օգտագործելով իր լիազորությունները:

Մասնավորապես, նույն բանկի վարչության նախագահի տեղակալ-Տարածքային զարգացման և տեղեկատվական տեխնոլոգիաների դեպարտամենտի տնօրեն Մելիք   Եսայանի, ԻԻՀ և ԱՄՆ քաղաքացի Մաջիդ Ռ Նազիֆի, ԻԻՀ և ԱՄՆ քաղաքացի, ՀՀ-ում գրանցված «Ալֆա Զեներալ Թրեյդինգ» ՍՊ ընկերության հիմնադիր-տնօրեն Բեհրուզ Բեհնամի, ԻԻՀ և ՀՀ քաղաքացի Վահիկ Մանուկյանսի, Շվեյցարիայի Համադաշնության ժնև քաղաքում գրանցված, «Կոսմոս Տրադինգ» ընկերության հիմնադիր, ՀՀ քաղաքացի Անդրանիկ Դոների, վերջինիս կողմից լիազորված անձ՝ Սուրեն Դաբրիելյանի և ՀՀ-ում գրանցված «Դավ Տրանս Ստրոյ» ՍՊ հիմնադիր տնօրեն, ՀՀ քաղաքացի Դավիթ  Դերզյանի հետ, մի խումբ անձանց կողմից նախնական համաձայնությամբ, 2012 թվականի օգոստոսից մինչև 2013 թվականի մարտ ամիսը ներառյալ ժամանակահատվածում, օգտագործելով իրավունք վերապահող պաշտոնական փաստաթղթեր հանդիսացող կեղծ պայմանագրեր և վճարման հանձնարարականներ, խարդախությամբ՝ խաբեության եղանակով հափշտակել, ապա օրինականացրել են Ռուսաստանի Դաշնության Մոսկվա քաղաքում գործող «Միր Բիզնես Բանկ» ՓԲ ընկերության կողմից, «Սբերբանկ» ՓԲ ընկերության միջոցով (միջնորդությամբ), «SWIFT» համակարգով «Հայբիզնեսբանկ» ՓԲ ընկերություն  փոխանցված առանձնապես խոշոր չափերով ընդհանուր 5.804.577.000 ՀՀ դրամին համարժեք 10.980.000 եվրո գումար, որից՝ 1.000.000  եվրոն նախատեսված է եղել գումարի իրական շահառու, Բանկում թղթակցային հաշվեհամարներ բացած, ԻԻՀ «Քիշ Ինտերնեյշնլ Բանկ» ընկերության համար, իսկ 9.980.000 եվրոն՝ «SWIFT» հաղորդագրություններում անճշտություններ լինելու և վերջնական շահառուն նշված չլինելու պատճառով, ենթակա Է եղել վերադարձման ուղարկող «Միր Բիզնես Բանկ» ՓԲ ընկերությանը, ինչի հետևանքով «Քիշ Ինտերնեյշնլ Բանկ» և «Միր Բիզնես Բանկ» ՓԲ ընկերությունները իրավունք են ձեռք բերել նույն չափով գումարներ ստանալու հայցապահանջ երկայացնել «Հայբիզնեսբանկ» ՓԲ ընկերության նկատմամբ, որը հատուցման պարտավորություն է ստանձնել։

Արա Կիրակոսյանին և Մելիք Եսայանին մեղադրանք է առաջադրվել ՀՀ քրեական օրենսգրքի 214-րդ հոդվածի 2-րդ մասով՝ առևտրային կազմակերպության ծառայողների կողմից լիազորությունները չարաշահելը, որն առաջացրել է ծանր հետևանքներ,  325-րդ հոդվածի  2-րդ մասով՝ մի խումբ անձանց կողմից նախնական համաձայնությամբ փաստաթղթեր կեղծելը, իրացնելը կամ օգտագործելը, 178-րդ հոդվածի  3-րդ մասի 1-ին կետով՝ առանձնապես խոշոր չափերի խարդախություն, 190-րդ հոդվածի 3-րդ մասի 1-ին կետով՝ առանձնապես խոշոր չափերի փողերի լվացում: