Փաստ ինֆո

Քիչ առաջ Ազգային ժողովում երկրորդ ընթերցմամբ ներկայացվեց կառավարության հեղինակած՝ «Վարչարարության հիմունքների և վարչական վարույթի մասին» օրենքում փոփոխություններ և լրացումներ կատարելու մասին» և կից ներկայացված օրինագծերի փաթեթը, ինչից պարզ դարձավ, որ դրանով առաջարկվող իրավակարգավորումները մնացել են անփոփոխ:

Այն է՝ որոշակի համաներում է սահմանվում ճանապարհային երթևեկության կանոնների՝ նախկինում կատարված իրավախախտման համար: Մասնավորապես՝ նախկինում կայացրած վարչական ակտերով նախատեսված տուգանքի գումարն այս փոփոխությունների և լրացումների ուժի մեջ մտնելուց հետո 6 ամսվա ընթացքում վճարելու դեպքում վարչական իրավախախտում կատարած անձն ազատվում է գումարը չվճարելու հետևանքով նախատեսված տուգանքի չափի ավելացած մասը վճարելու  պարտականությունից:

Մինչև 2012 թվականի հունվարի մեկը ՃԵԿ խախտում կատարած անձիք ազատվում են վարչական ակտով նախատեսված տուգանքի գումար վճարելու  պարտականությունից:

Ընդդիմախոսների հիմնական առարկությումը վերաբերում է նրան, որ նախագծով կառավարությունը, մասնավորապես, առաջարկում է սահմանել, որ հանրային իրավական դրամական պահանջներն ենթակա են հարկադիր կատարման ՀՀ վարչական դատավարության օրենսգրքով սահմանված կարգով՝ օրինական ուժի մեջ մտած վճռով տրված կատարողական թերթի հիման վրա, եթե  ֆիզիկական անձից գանձման ենթակա դրամական պահանջը գերազանցում է 200 հազար դրամը:

Սա նշանակում է, որ վարչական իրավախախտման համար մինչև 200 հազար դրամը գանձման ենթակա դրամական պահանջը, ինչպեսև այսօր գործող իրավակարգավորման  դեպքում, լուծվելու է արտադատական կարգով: Այն է՝ քաղաքացիների գույքի վրա կշարունակվի կալանք դրվել և կիրականացվի բռնագանձում՝ առանց դատարանի որոշման:

Այս դրույթի պատճառով ԱԺ-ը նոյեմբերի 20-ին մերժել էր օրենսդրական  փաթեթը, սակայն այն կառավարության կողմից կրկին ներկայացվել է ԱԺ-ի ընդունմանը:

ԱԺ անկախ պատգամավոր Էդմոն Մարուքյանը, դիմելով կառավարության ներկայացուցչին, մասնավորապես, ասաց. «Չգիտեմ՝ ո՞վ, ո՞ւմ աշխատասենյակում, ի՞նչ եք քննարկել Վարչական դատարանի դատավորների հետ, ի՞նչ եզրահանգումների են եկել, ես կարծում եմ, որ դատարանով անցնելու ընթացակարգը շատ կարևոր է, և Սահմանադրությունը որևէ պարագայում, սահմանադրական սզբունքները որևէ իրավիճակում զիջելը չի կարող բխել իրավական պետության շահերից»:

Ըստ նրա՝ իրավական պետությունում քաղաքացին վճարում է հարկեր, և «այդ հարկերից մենք պահում ենք դատավորներ, վարչական մարմիններ, վարչական մարմինների իրավաբանական բաժիններ, և նրանք պարտավոր են իրենց գործառույթները կատարել և ոչ թե բեռը դնել քաղաքացիների վրա»: Է.Մարուքյանն ընդգծեց, թե դեմ են դրա համար, այլ ոչ թե համաներմանը:

Ի դեպ՝ առավոտյան հիշյալ փաթեթն առաջին ընթերցմամբ ընդունվել էր 69 «կողմ», 8  «դեմ» ձայներով: Կողմ էր քվեարկել միայն ՀՀԿ-ն: