Փաստ ինֆո

Ազգային ժողովը քիչ առաջ ավարտեց կառավարության նախաձեռնությամբ դեկտեմբերի 15-ին հրավիրված արտահերթ նստաշրջանի աշխատանքը և սկսեց ֆինանսական շուկայում առկա իրավիճակի քննարկման նպատակով  պատգամավորների նախաձեռնությամբ հրավիրված արտահերթ նստաշրջանի աշխատանքը:

ԱԺ ընդունած որոշման համաձայն՝ այն անցկացվում է դռնփակ՝ առանց ընդմիջման: Որոշումն ընդունվեց 75 «կողմ», 6 «դեմ» և 1 «ձեռնպահ» ձայներով:

Դեմ քվեարկեցին  «Ժառանգություն» և «Հայ ազգային կոնգրես» խմբակցությունների անդամները:

Քվեարկությունից առաջ ՀԱԿ խմբակցության անդամ Նիկոլ Փաշինյանը, մասնավորապես, հայտարարեց, թե շատ է ասվում, որ սպեկուլյատիվ աժիոտաժ է ստեղծվում: «Հիմա մարդիկ իմանան, որ Ազգային ժողովում դռնփակ նիստ են անում, այս սպեկուլյատիվ աժիոտաժն ավելի է մեծանալու: Մարդիկ այսօր պատասխաններ են ակնկալում կառավարությունից, Ազգային ժողովից, Կենտրոնական բանկից»,-հայտարարեց Ն.Փաշինյանը՝ ընդգծելով, որ ինքը դեմ է դռփակ ռեժիմին:

ՀՀԿ խմբակցության ղեկավար Վահրամ Բաղդասարյանն էլ հակադարձեց, թե  «ևս մեկ անգամ մեր որոշ գործընկերներ փորձ են կատարում, որ, իրոք, բնակչության մեջ աժիոտաժ ստեղծեն»: Նաև հավելեց. «Սա մենք պետք է որպես հաղորդում ընդունենք, և, բնականաբար, ավարտվելուց հետո հանրությունը համապատասխան հաղորդումով կիրազեկվի: Ճիշտ է փակ նիստ անելը, որպեսզի որոշ մարդիկ չօգտվեն այս խոսափողներից և սկսեն ժողովրդին անհարմար և տագնապալի վիճակի մեջ գցել»:

Խորհրդարանում հավատարմագրված լրագրողներին խնդրեցին ազատել իրենց համար նախատեսված օթյակները:

Նշենք, որ նստաշրջանը դռնփակ անցկացնելու առաջարկը ԱԺ նախագահ Գալուստ Սահակյանինն էր: