Փաստ ինֆո

Վարդան Պետրոսյանի վթարի գործով դատական նիստը դարձյալ հետաձգվեց մեկ շաբաթով: Հետաձգվեց նաև Վարդան Պետրոսյանի կողմից տուժողներին շուրջ 13 մլն դրամով փոխհատուցելու վերաբերյալ տուժող կողմի փաստաբան Ռուբեն Բալոյանի միջնորդության քննարկումը:

Պատճառը դատարանում բացահայտված այն իրողությունն էր, որ տուժողներն ունեցել են կյանքի և առողջության ապահովագրություն:

Վարդան Պետրոսյանի փաստաբաններ Նիկոլայ Բաղդասարյանն ու Սամվել Ջաղինյանն էլ այս կապակցությամբ փորձեցին ճշտել, թե ինչու՞ վթարի հերևանքով մարմնական վնասվածքներ ստացած Տաթևիկ Հակոբյանի բուժման ծախսերը ապահովանգրական ընկերությունը չի կատարել: Պարզվեց կատարել է, բայց՝ մասամբ:

«1 մլն 800 հազարից ավել չեն տվել»,- ասաց տուժող Տաթևիկ հակոբյանի հայրը` հավելելով, որ իր երեխայի վերականգնողական բուժման համար անհրաժեշտ բուժական լողի համար գումարն իր գրպանից է վճարել:

«Ասել է մլն 800 հազարից ավել չենք տալիս, չկա, վերջ»,- ասաց Արթուր Հակոբյանը: Իսկ դատարանի հարցին, թե դա ո՞ր ապահովագրական ընկերությունն է, պատասխանեց`«Ռոսգոսստրախ»-ը:

Տուժողը նաև վստահեցրեց, որ պահանջված 13 մլն դրամի մեջ ապահովագրական ընկերության հատկացրած 1 800 000 դրամը հաշվարկված չէ:

Արդյունքում՝ Վարդան Պետրոսյանի փաստաբանը միջնորդեց դատարանին դիմել ապահովագրական բյուրո և տեղեկատվություն պահանջել՝ Տաթևիկ Հակոբյանին հատկացված ապահովագրական գումարի և դրա ծախսի վերաբերյալ:

Իսկ մինչ այդ նիստը որոշվեց հետաձգել մինչև դեկտեմբերի 25-ի ժամը 14:00-ն: