Փաստ ինֆո

Ազգային ժողովը քիչ առաջ վերսկսեց կառավարության նախաձեռնությամբ դեկտեմբերի 15-ին հրավիրված արտահերթ նստաշրջանի աշխատանքը: Ինչպես հայտարարեց ԱԺ նախագահ Գալուստ Սահակյանը, ամենայն հավանականությամբ, խորհրդարանն արտահերթ նստաշրջանի աշխատանքը կավարտի ժամը 15:00-ից հետո:

Այսօրվա նիստին մասնակցում են երկուշաբթի օրվանից արտահերթ նստաշրջանը բոյկոտած ոչ իշխանական չորս խմբակցություններից 3-ը՝  «Բարգավաճ Հայաստան»-ը, «Ժառանգություն»-ը, «Օրինաց երկիր»-ը: «Հայ ազգային կոնգրես»-ից մասնակցում են միայն Նիկոլ Փաշինյանը և նախկին վարչապետ Հրանտ Բագրատյանը:

Հիշեցնենք, որ «Բարգավաճ Հայաստան», «Ժառանգություն», «Օրինաց երկիր» և «Հայ ազգային կոնգրես» խմբակցությունները դեկտեմբերի 15-ին հայտարարել էին, թե քանի դեռ հրատապ կարգով չեն քննարկվել ազատամարտիկների և ՀԱԿ խմբակցության քարտուղար Արամ Մանուկյանի նկատմամբ վերջին օրերին տեղի ունեցած բռնությունները և ԱԺ հայտարարությամբ չեն դատապարտվել դրանք, իրենք բոյկոտում են կառավարության նախաձեռնությամբ հրավիրված արտահերթ նստաշրջանը, և լքել դահլիճը:

Նույն օրը, նման հայտարարություն ընդունելու նպատակով, վերոհիշյալ 4 խմբակցությունների նախաձեռնությամբ հրավիրված արտահերթ նստաշրջանին ՀՀԿ-ն չներկայացավ, և այն տապալվեց:

Հաջորդ օրը՝ դեկտեմբերի 16-ին՝ երեկոյան, արդեն ՀՀԿ և ՀՅԴ խմբակցությունների նախաձեռնությամբ հրավիրված արտահերթ նստաշրջանում ԱԺ-ն այնուամենայնիվ ընդունեց վերջիններիս համատեղ հեղինակած՝ քաղաքական, հասարակական գործիչների հանդեպ բռնությունների վերաբերյալ ԱԺ հայտարարության տարբերակը:

Ոչ իշխանական 4 խմբակցությունների՝ նիստին մասնակցած ներկայացուցիչները քվեարկությանը չմասնակցեցին: Բացառություն էր միայն դեմ քվեարկած Նիկոլ Փաշինյանը, ով ելույթում նախապես հայտնել էր իր որոշման մասին:

Նշենք, որ խորհրդարանն այսօրվա նիստի սկզբին ընդունեց նախօրեին քննարկված մոտ մեկ տասնյակ օրինագծերն ու օրենսդրական փաթեթները և վավերացրեց միջազգային 5 վարկային համաձայնագրերը:  

Ի դեպ՝ ի տարբերություն հիմնականում «դեմ» քվեարկած «Ժառանգության»,  «Բարգավաճ Հայաստան»-ը և «Օրինաց երկիր»-ը դեմ էին միջազգային համաձայնագրերին, իսկ օրինագծերի քվեարկությանը չմասնակցեցին: