Փաստ ինֆո

«Բանդայի գործով» ամբաստանյալ Սամվել Դավթյանի պաշտպան Կարեն Հակոբյանն այսօր միջնորդեց իր պաշտպանյալին անպարտ ու անմեղ ճանաչել՝ հանցակազմի բացակայության հիմքով:

Ըստ նրա՝ գործով նախաքննությունն իրականացվել է միակողմանի, խոշտանգումների ու կեղծիքների ճանապարհով ստեղծվել են տիպական մեղադրանքը հաստատող ապացույցներ:

Մեղադրանքում բացակայում է ամբաստանյալների կոնկրետ արարքների նկարագրությունը: Մասնավորապես, իր պաշտպանյալի նկատմամբ խոշտանգումներ են իրականացվել՝ անհայտ անձանց կողմից կատարված ավազակային հարձակումների մասին  «խոստովանական ցուցմունք» կորզելու նպատակով: Ըստ  պաշտպանի՝ քննությունը քրեադատավարական պրոֆեսիոնալ չափանիշներից շատ հեռու է եղել:

Նախաքննության փուլում մեղադրանքների հաստատման համար, ըստ Կարեն Հակոբյանի, վճռորոշ են եղել ինչպես  լրատվամիջոցների հրապարակումները, այնպես էլ բարձրաստիճան պաշտոնատար անձանց  հայտարարությունները բանդայի բացահայտման մասին:

Ըստ Կարեն Հակոբյանի՝ մեղադրողի ու դատարանի նախաձեռնությամբ հետազոտվել են հանգուցյալներ Գուրգեն Հայրապետյանի ու Արման Դալլաքյանի (նրանց նկատմամբ քրեական հետապնդումը դադարեցվել է մահվան հիմքով) մեղավորությանն առնչվող ապացույցներ, ինչը հակասում է Մարդու իրավունքների եվրոպական դատարանի իրավական դիրքորոշմանը:

Գործով ամբաստանյալ Արտուշ Հակոբյանի պաշտպան Հովիկ Արսենյանը միջնորդեց իրեն ժամանակ տրամադրել՝  պաշտպանական ճառում իր դիրքորոշումները վերանայելու համար՝ չկրկնվելու նպատակով:

Հաջորդ դատական նիստում պաշտպանը կներկայացնի իր պաշտպանական ճառը, եթե ցանկանան, պաշտպանական ճառերով հանդես կգան նաև ամբաստանյալները, ապա կողմերը կօգտվեն ռեպլիկի, ամբաստանյալները՝ վերջին խոսքի իրավունքից, և դատարանը կհեռանա խորհրդակցական սենյակ՝ դատական ակտ կայացնելու: