Փաստ ինֆո

Ազգային ժողովի ոչ իշխանական խմբակցությունների անդամների նախաձեռնությամբ, այսօր` ժամը 18.30-ին, հրավիրված ՀՀ Ազգային ժողովի արտահերթ նստաշրջանը նշված ժամին չսկսվեց: Նիստը սկսելու համար անհրաժեշտ էր, որպեսզի գրանցվեր առնվազն 66 պատգամավոր, մինչդեռ գրանցվել էին ընդամենը 43-ը:

ԱԺ նախագահ Գալուստ Սահակյանը հայտարարեց, որ ԱԺ կանոնակարգ-օրենքի համաձայն, գրանցումը շարունակվում է և երեք ժամվա ընթացքում քվորումը չապահովվելու  դեպքում, նիստը կհայտարարվի չկայացած:

Հիշեցնենք, որ արտահերթ նստաշրջանը հրավիրվել էր վերջին օրերին տեղի ունեցած բռնությունները դատապարտող ԱԺ հայտարարություն ընդունելու նպատակով:

Քաղաքական փոքրամասնության կողմից քննարկմանն առաջարկվող ԱԺ հայտարարության նախագծում ասված է.

« Վերջին շրջանում տեղի ունեցած բռնարարքները՝ ավտոմեքենաների հրկիզում, քաղաքացիական ակտիվիստների և ազատամարտիկների ծեծ, հարձակում ԱԺ պատգամավոր Արամ Մանուկյանի վրա, առաջացրել են Ազգային ժողովում ներկայացված բոլոր քաղաքական  ուժերի խորը մտահոգությունն ու անհանգստությունը։ Խստորեն դատապարատելի է փոխոստիկանապետ, Ներքին զորքերի հրամանատարի հայտարարությունը՝ իրեն օրենքից վեր դասելու և քաղաքացիներին սպառնալու մասին, ինչը անհամատեղելի է ոստիկանության բարձրաստիճան պաշտոնյայի կարգավիճակին։

Ազգային ժողովը պահանջում է.

1. Ազգային ժողովը խստորեն դատապարտում է տեղի ունեցած բռնարարաքները և իրավապահ մարմիններից պահանջում  ձեռնարկել բոլոր հնարավոր միջոցները՝ սեղմ ժամկետներում այս հանցագործությունների կազմակերպիչ կամ մեղսակից բոլոր անձանց  ի հայտ բերելու, և օրենքով սահմանված կարգով քրեական պատասխանատվության  ենթարկելու համար։

2. Բռնության կոչերի և դատապարտելի հայտարությունների համար անհապաղ պաշտոնանկ անել Ոստիկանության Զորքերի հրամանատար, փոխոստիկանապետ Լևոն Երանոսյանին։

3. Ազգային ժողովը պահանջում է  ձեռնակել օրենքով սահմանված բոլոր միջոցները՝ այսուհետ կանխելու քաղաքակիրթ և ժողովրդավար  երկրին անհարիր  նման երևույթները»։

Նստաշրջանը նախաձեռնել էին «Բարգավաճ Հայաստան», «Ժառանգություն», «Օրինաց երկիր» և «Հայ ազգային կոնգրես» խմբակցությունների պատգամավորները, ովքեր այսօր բոյկոտեցին ժամը 12-ին կառավարության նախաձեռնությամբ հրավիրված արտահերթ նստաշրջանը, քանի դեռ ԱԺ-ն չի քննարկել և դատապարտել ազատամարտիկների և «Հայ ազգային կոնգրես» խմբակցության քարտուղար Արամ Մանուկյանի  վրա հարձակումները:

Ի պատասխան՝ ՀՀԿ-ն էլ տապալեց ոչ իշխանական թևի նախաձեռնությունը՝ չներկայանալով վերջիններիս նախաձեռնությամբ հրավիրված արտահերթ նիստին: