Փաստ ինֆո

Ազգային ժողովի նախագահ Գալուստ Սահակյանի մոտ խմբակցությունների ղեկավարների մասնակցությամբ այսօր հրավիրված հրատապ խորհակցության ընթացքում պայմանավորվածություն է ձեռք բերվել՝ հանդես գալ ազատամարտիկների և «Հայ ազգային կոնգրես» խմբակցության քարտուղար Արամ Մանուկյանի  վրա հարձակումները դատապարտող համատեղ հայտարարությամբ:

Ինչպես խորհրդակցության ավարտից հետո ԱԺ ամբիոնից հայտարարեց Գ.Սահակյանը, կա՛մ հայտարարությունը կլինի խմբակցությունների ղեկավարների ստորագրությամբ, կա՛մ, եթե նպատակահարմար կհամարվի, ԱԺ-ն կարող է ժամը 18:30-ից հետո այդ կապակցությամբ արտահերթ նիստ հրավիրել:

ԱԺ նախագահը միևնույն ժամանակ ընդգծեց, թե այն, որ խոսք է գնում կառավարության նախաձեռնությամբ հրավիրված արտահերթ նստաշրջանն ընդհատելու և հրատապ կարգով ստեղծված իրավիճակը քննարկելու մասին, «դա օրենքների հետ որևէ աղերս չունի»:

Գ.Սահակյանը հավելեց. «Եթե համագործակցում ենք, փորձում ենք համատեղ լուծումներ գտնել, յուրաքանչյուր ձախողում մեր կողմից կդիտարկվի որպես Ազգային ժողովի աշխատանքների ձախողում»:

ԱԺ նախագահի այս հայտարարությանը հետևեց «Ժառանգություն» խմբակցության ղեկավար Ռուբիկ Հակոբյանի հայտարարությունն այն մասին, թե իրենք կարևորում են այն, որ խորհրդակցության ժամանակ բոլոր խմբակցությունները համաձայն են եղել արտահերթ նիստում ստեղծված իրավիճակի քննարկմանը:

Նա հայտնեց նաև, որ միաժամանակ իրենք հայտարարել են՝ քանի դեռ այս հարցը չի քննարկվել, իրենք «ճիշտ, օգտակար» չեն գտնում, որպեսզի անդրադառնան կառավարության հրավիրած արտահերթ նստաշրջանի օրակարգին, ուստի՝ «Բարգավաճ Հայաստան», «Ժառանգություն», «Օրինաց երկիր» և «Հայ ազգային կոնգրես» խմբակցությունները բոյկոտում են այս արտահերթ նիստը:

Այս հայտարարությունից հետո վերոհիշյալ 4 խմբակցությունները լքեցին ԱԺ դահլիճը: