Փաստ ինֆո

Մարդու իրավունքների եվրոպական դատարանում ՀՀ կառավարության լիազոր ներկայացուցչի գործունեությունն ուղղված է ոչ միայն զուտ մարդու իրավունքների պաշտպանությանը, այլ նաև՝ առավելապես մարդու իրավունքների պաշտպանության երաշխավորմանը: Նշելով այս մասին լրագրողների հետ այսօրվա հանդիպմանը՝ ՄԻԵԴ-ում ՀՀ կառավարության լիազոր ներկայացուցիչ Գևորգ Կոստանյանը հավելեց, որ վիճակագրությունն ինքնին խոսուն է:   

Այն, որ 2002 թվականից ի վեր Հայաստանի դեմ ՄԻԵԴ-ում 2000 գանգատների առկայության պարագայում 49 վճիռ է եղել, որից 48-ով է խախտում արձանագրվել, Գ.Կոստանյանի գնահատմամբ, դրական ցուցանիշ է:

Համեմատության մեջ պետք է դիտարկել նաև այն, որ 2014թ. նոյեմբերի 1-ի դրությամբ ներկայացված շուրջ 15 մլն 260 հազար եվրոյին համարժեք փոխհատուցման պահանջից բավարարվել է շուրջ 574 հազար եվրոյի պահանջը, ինչը Գևորգ Կոստանյանը ողջամիտ է համարում:

«Այլ երկրների և, մասնավորապես, մեր հարևան երկրների համեմատությամբ մենք նվազագույն շեմին անգամ չենք հասել»,- ասաց նա:

Կառավարության լիազոր ներկայացուցիչը բացարձակապես չկիսեց իրավապաշտպանների այն հայտարարությունը, թե լիազոր ներկայացուցիչն ամեն ինչ անում է, որ գանգատները չհասնեն ՄԻԵԴ:

Նա ընդգծեց, որ կառավարության լիազոր ներկայացուցիչը ո՛չ գործուն, ո՛չ տեսական, ո՛չ էլ հիպոթետիկ հնարավորություն ու լիազորություն չունի որևէ կերպ խոչընդոտել այս կամ այն գանգատը ՄԻԵԴ ներկայացնելուն:

Գևորգ Կոստանյանը նշեց, որ ՄԻԵԴ վճիռներով արձանագրված խախտման յուրաքանչյուր դեպքում քննարկման առարկա է դառնում, թե վճռի պայմաններում կա՞ն հիմքեր՝ դատավորի կամ այլ պաշտոնատար անձի նկատմամբ կարգապահական միջոցներ կիրառելու համար:

Գ.Կոստանյանը հիշեց, որ ինքը՝ որպես կառավարության լիազոր ներկայացուցիչ, ժամանակին միջնորդել էր արդարադատության նախարարին Միշա Հարությունյանն ընդդեմ Հայաստանի գործով ՄԻԵԴ վճռի հետ կապված կարգապահական վարույթ հարուցել դատավորի նկատմամբ, Արդարադատության խորհրդի որոշմամբ՝ խիստ նկատողություն էր հայտարարվել դատավորի նկատմամբ՝ 6 ամսվա ընթացքում  աշխատավարձի 25%-ի պահումով: