Փաստ ինֆո

Երեկ  հրազենի գործադրմամբ սպանության փորձի դեպք   էր արձանագրվել Երևանում: Այսօր «Փաստինֆո»-ին հայտնի են դարձել որոշ մանրամասներ դեպքի առնչությամբ: 

Այսպես, երեկ, ժամը 13:10-ին որովայնի շրջանում հրազենային վնասվածքով «Մալաթիա» բժշկական կենտրոն բուժօգնության էր դիմել 39-ամյա Ստեփան  Ամիրշադյանը,   նրա մոտ ախտորոշվել էր  որովայնի ձախ կեսի հրազենային միջանցիկ թափանցող վնասվածք՝  մեծ ճարպոնի և սիգմայաձև հաստ աղու միջընդերքի վնասումով: 

Ստեփան  Ամիրշադյանը հայտնել էր, որ նշված վնասվածքը ստացել է  անհայտ անձի կողմից՝ Մալաթիայից դեպի Ախպարաշեն տանող ճանապարհին:

 Նույն օրը   ոստիկանության Մալաթիայի բաժին բերման էր   ենթարկվել Շիրակ  Ավետիսյանը, ով  ձերբակալվել էր ՀՀ քրեական օրենսգրքի 34-104-րդ հոդվածի 1-ին մասով և 235-րդ հոդվածի 1-ին մասով նախատեսված հանցավոր արարքներ կատարելու կասկածանքով:

 Դեպքի մասին նրա հայտնած տեղեկություններն էապես տարբերվել են տուժողի  ասածներից: Կասկածյալը հայտնել է, որ   տուժողն ու ինքը փոխադարձ  հայհոյանքներ  են տվել  միմյանց և այդ կապակցությամբ  պարզաբանումներ կատարելու նպատակով երեկ կեսօրին գնացել են  «4-րդ գյուղի գերեզմանատուն»: Այնտեղ  առաջացած վիճաբանության ժամանակ Շ.Ավետիսյանը բռունցքով հարվածել է  Ս.Ամիրշադյանի կրծքավանդակին, և   նա վայր է ընկել գետնին: Այդ ժամանակ վերջինիս մոտից գետնին ընկել է ատրճանակ, որը  վերցնելով՝  Շ.Ավետիսյանը երկու անգամ կրակել է Ս.Ամիրշադյանի վրա` պատճառելով նրան հրազենային վնասվածք:

 Ստեփան Ամիրշադյանը չի հարցաքննվել, որովհետև գտնվել է վերակենդանացման բաժնում՝  ցավազրկող-թմրեցնող դեղամիջոցների ազդեցության տակ, բայց  նա  ճանաչվել  է  որպես  տուժող,  հարցաքննվել է նրա մայրը:

ՀՀ Քննչական կոմիտեի Մալաթիա-Սեբաստիա վարչական շրջանի քննչական բաժնում ՀՀ քրեական օրենսգրքի 34-104-րդ հոդվածի 1-ին մասով ` սպանության փորձ,  և 235-րդ հոդվածի 1-ին մասով՝ ապօրինի զենք,  հարուցվել է  քրեական գործ:

Ս.Ամիրշադյանի  նկատմամբ  նշանակվել է դատաբժշկական փորձաքննություն:

Քրեական գործով նախաքննությունը շարունակվում է: