Փաստ ինֆո

Ինչպես կառավարության նախորդ, այնպես էլ այս նիստն այսօր սկսվեց սպառողական ապրանքների թանկացման թեմայով:

Հիշեցնենք՝ նախորդ շաբաթ կայացած նիստում վարչապետ Հովիկ Աբրահամյանը ՏՄՊՊՀ նախագահ Արտակ Շաբոյանին հանձնարարել էր ուսումնասիրել և զեկուցել գների բարձրացման պատճառներն ու չափերը:

Արտակ Շաբոյանն իր զեկույցում այսօր ներկայացրեց միայն իր ղեկավարած մարմնի իրավասությունների տիրույթում գտնվող ապրանքների` խոշոր տնտեսվարողների արտադրած ու ներկրած ապրանքների գների թանկացումները, մասնավորապես՝ դրանց հիմնավորվածության և հնարավոր չարաշահումների դեպքերը: Այդպիսիք, Արտակ Շաբոյանի խոսքով, չեն հայտնաբերվել: Իսկ ունենցած գնաճը 2-13%-ի սահմաններում է, այսինքն` համահունչ է փոխարժեքի 13% փոփոխություններին, և չի գերազանցում այդ շեմը:

Այդ շեմը գերազանցում է միայն հնդկաձավարի գինը, ինչը, ՏՄՊՊՀ նախագահի խոսքով, կապված է ՌԴ-ում այդ ապրանքատեսակի թանկացման հետ: Արտակ Շաբոյանը նշեց, որ ՌԴ հակամրցակցային հանձնաժողովն արդեն իսկ այս հարցով զբաղվում է, և հույս հայտնեց, որ դրա արդյունքում հարցը կկարգավորվի նաև ՀՀ-ում:

Արտակ Շաբոյանն ասաց, որ ձեռնպահ կմնա առանձին ապրանքատեսակների գնային փոփոխությունները ներկայացնելուց, քանի որ տարբեր ապրանքներ տարբեր խանութներում կարող են տարբեր մանրածախ գներ ունենալ:

«Շարունակելու ենք հետևել խոշոր ընկերությունների վարքագծին, որ թույլ չտանք հակամրցակցային գործողություններ կատարվեն: Իսկ հայտնաբերելու դեպքում չարաշահումներ թույլ տվողները կպատժվեն»,- ավարտելով զեկույցը՝ նշեց ՏՄՊՊՀ նախագահը: