Փաստ ինֆո

Ով է քաղբանտարկյալը, և ով է նրան ճանաչում որպես քաղբանտարկյալ: Այսօր ԱԺ-ում հրավիրված այս թեմայով լսումների ժամանակ պատասխանելով այս հարցերին, ՀՀ Արդարադատության նախարարի տեղակալ Արման Թաթոյանն ասաց. «Ապացուցման բեռն անձի վրա է, եթե հակառակը չի ապացուցում պետությունը»:

Այսինքն` պետությանը մնում է միայն հերքել, ու եթե դա նրան չի հաջողվում, մարդը համարվում է քաղբանտարկյալ: Արման Թաթոյանի խոսքով՝ այսպիսին է ԵԽԽՎ համապատասխան բանաձևի տրամաբանությունը: Սակայն ՀՀ օրենսդրությամբ դա սահմանված չէ:

Այսօր ՀՀ-ում կան դատապարտված անձինք, ովքեր իրենց հայտարարում են քաղբանտարկյալ, ասաց ԱԺ պատգամավոր Զարուհի Փոստանջյանը, և հարց ուղղեց փոխնախարարին, թե ինչ է անում ՀՀ արդարադատության նախարարությունն այս անձանց համար, որպեսզի այդ գործերը չհասնեն Եվրոպական դատարան, և կորուստներն ահռելի չլինեն: Արման Թաթոյանը, սակայն, հարցին հստակ պատասխան չտվեց` նշելով, որ հարցի իրավական կարգավորումներ ու հստակ վիճակագրություն չկա:

Փոխարենը վիճակագրությունը ներկայացրեց իրավապաշտպան Արտակ Զեյնալյանը: Նա հիշեցրեց, որ ԵԴ-ն մինչ օրս ՀՀ-ի դեմ կայացրել է 52 վճիռ, որոնց 1/3-ը` քաղաքական հետապնդման վերաբերյալ: Արտակ Զեյնալյանը նաև հարց ուղղեց Արման Թաթոյանին, թե այդ մարդկանց քաղաքական հետապնդման ենթարկած անձանցից քանիսն են պատասխանատվության ենթարկվել:

Զեյնալյանը օրինակ բերեց Գրիշա Վիրաբյանի գործը՝ հիշեցնելով, որ այս գործով տրվել էր կոնկրետ պաշտոնատար անձի անուն, և «այդ անձը դեռ մինչև հիմա պաշտոնավարում է»,- ասաց նա:

Արման Թաթոյանը, սական, շրջանցնեց հարցը, թե քանի անձ է պատասխանատվության ենթարկվել քաղաքական հետապնդում իրականացնելու համար և անդրադարձավ միայն Գրիշա Վիրաբյանի գործին` հայտնելով, որ դրանով ԵԴ-ն նման խախտում չի աձանագրել:

«Գործով չի ապացուցվել քաղաքական հետապդնման կոմպոնենտը»,- ասաց նա` հավելելով, որ ԵԴ-ն արձանագրել է միայն դատաիրավական խախտում: