Փաստ ինֆո

Պաշտպանության բանակ զորակոչված և զինհոսպիտալում մահացած նորակոչիկ Նորայր Սահակյանը և նորակոչիկ Դավիթ Ղարագյոզյանը հոսպիտալում գտնվելու ընթացքում մշտապես  եղել են բուժանձնակազմի հսկողության տակ:

Նման հայտարարությամբ այսօր հանդես եկավ Դավիթ Ղարագյոզյանը, ով այս գործով անցնում է որպես վկա։ Վերջինս Նորայրի հետ զորամաս է ուղևորվել նույն ավտոբուսով, ապա՝ նրա հետ միասին գտնվել նույն հոսպիտալում:

Երևանի Արաբկիր և Քանաքեռ-Զեյթուն վարչական շրջանների ընդհանուր իրավասության դատարանում վկան հայտնեց,  որ 2012թ. աշնանային զորակոչի ժամանակ՝  հավաքակայանում, իրեն 5 ներարկում է կատարվել, ապա  ավտոբուսով ուղևորվել են ԼՂՀ  N զորամաս, որտեղ վատացել է  իր ինքնազգացողությունը,  գլխացավ է ունեցել, անգամ կարծել է, որ ջերմություն ունի, սակայն այդ մասին միայն ընկերոջն է ասել:

Ըստ վկայի՝ ինքնազգացողության վատթարացումը  պայմանավորված է եղել երկար ճանապարհով և հոգնածությամբ: Զորամաս ուղևորվելու ամբողջ ճանապարհին ավտոբուսը մի քանի անգամ կանգ է առել, զորակոչիկները հոգացել են իրենց բնական կարիքները, թեյ խմել։

Այդ ընթացքում վկան  նկատել է, որ նորակոչիկներից մեկը ևս իրեն վատ է զգում, ում տեղափոխել  ու նստեցրել են ավտոբուսի առջևի մասում: Վկան պատմեց, թե տեղ հասնելուն պես հետաքրքրվել են, նորակոչիկների ինքնազգացողությամբ, ապա ստուգել գանգատներ ունեցողների ջերմությունը եւ տեղափոխել հոսպիտալ։

Նա նաեւ նշեց, որ իրենց  տեղափոխել են հոսպիտալ և պառկեցրել  նույն հիվանդասենյակում, սակայն, առողջական վատ վիճակով պայմանավորված, շատ չեն հաղորդակցվել։ Ամբողջ ընթացքում քնած են եղել և  միայն հաց ուտելու ժամանակ են խոսել,  ու Նորայրն ասել է, որ իրեն լավ է զգում և որ փոքր եղբորը կարոտել է: Ըստ վկայի՝ Նորայրի վիճակն ավելի վատ է եղել, քան իրենը, սակայն ոչ մի պահ չի կասկածել, որ այդպիսի ելք կունենա: Վկան նաև նշեց, որ երբ իրենց տեղափոխել են հոսպիտալ, իրենք հրաժարվել են ներարկումից՝ կարծելով, որ հոգնածության հետևանք է իրենց վատ ինքնազգացողությունը:

Ավելի ուշ, երբ վկան քնից արթնացել է և տեսել, որ Նորայրը փսխում է, իսկ կեսգիշերին երկու ֆելդշերի  և իր օգնությամբ Նորայրին պատգարակով տեղափոխել են հոսպիտալի դիմաց կանգնած ավտոմեքենայի մոտ,  սակայն վկան դժվարացավ ասել, թե ուր են տեղափոխել Նորայրին,  այդ ժամանակ  նա  ողջ է եղել, թե՝ ոչ:

Նշենք  նաև, որ վկան չէր հիշում՝ ոչ իր և ոչ էլ Նորայրի ջերմությունը որքան է եղել:

Վկայի ցուցմունքներում առկա էական հակասությունների պատճառով պաշտպանական կողմը միջնորդեց հրապարակել նրա նախաքննական ցուցմունքը, ինչին առարկեց մեղադրողը:

Միջնորդությունը բավարարվեց մասնակի և հրապարակվեց վկայի ցուցմունքի միայն մի հատվածը, որտեղ  նշված էր, որ դեպքի օրը՝ երեկոյան ժամը 21.00-ի սահմաններում, իր ջերմությունը եղել է 36.6 , իսկ Նորայրինը՝ 37.2:

Այսօրվա դատական նիստին չէր հաջողվել 3 վկաների բերման ենթարկել: Դատարանը կփորձի նրանց ներկայությունն ապահովել հաջորդ դատական նիստին: