Փաստ ինֆո

ՀՀ մի խումբ քաղաքացիներ՝ «Հանրապետություն» կուսակցության առաջնորդ Արամ Սարգսյանը, Դվին Իսանյանսը, Ռուդոլֆ Հովակիմյանը և Մագդա Եղիազարյանը, դիմել են Սահմանադրական դատարան՝ խնդրելով ՀՀ սահմանադրությանը հակասող և անվավեր ճանաչել ՀՀ վարչական դատավարության օրենսգրքի 154-րդ հոդվածի՝ վճռաբեկ բողոք բերելու իրավունքը, 4-րդ մասը և 158-րդ հոդվածի՝ վճռաբեկ բողոքի բովանդակությունը, 5-րդ մասը:

Դիմողները գտնում են, որ վիճարկվող օրենսդրական դրույթներով սահմանված պահանջները սահմանափակում են դատարանի մատչելիության՝ իրենց սահմանադրական իրավունքի իրացումը:

Ըստ նրանց՝ ՀՀ վարչական դատավարության օրենսգրքի 154-րդ հոդվածի 4-րդ մասով սահմանված՝ ՀՀ վճռաբեկ դատարանին բողոքարկման ենթակա ակտերը բացառապես փաստաբանի միջոցով ներկայացնելու օրենսդրական պահանջը բացառում է ֆիզիկական և իրավաբանական անձի կողմից անձամբ կամ իր ընտրած անձի միջոցով վճռաբեկ բողոք բերելու հնարավորությունը:

Վիճարկվող 158-րդ հոդվածի 5-րդ մասն էլ սահմանում է, որ վճռաբեկ բողոքին, ի թիվս այլ փաստաթղթերի, կցվում է նաև վճռաբեկ բողոքի էլեկտրոնային տարբերակը (էլեկտրոնային կրիչը):

Հաշվի առնելով, որ դեռևս հուլիսի 23-ին վարույթ էր ընդունվել մեկ այլ քաղաքացու՝ Արա Սարգսյանի, դիմումի հիման վրա՝ ՀՀ վարչական դատավարության օրենսգրքի 154-րդ հոդվածի 4-րդ մասի՝ ՀՀ սահմանադրության համապասխանության հարցը որոշելու վերաբերյալ գործը, ՍԴ-ն որոշել էր քաղաքացիներ Արամ Սարսգյանի, Դվին Իսանյանսի, Ռուդոլֆ Հովակիմյանի և Մագդա Եղիազարյանի դիմումների հիման վրա գործերը՝ վերոհիշյալ դրույթի մասով միավորել Արա Սարգսյանի գործի հետ:

Միավորված գործի դատաքննությունը նշանակված էր այսօր՝ դեկտեմբերի 9-ին, սակայն ՍԴ-ն որոշեց այն հետաձգել՝ նույն գործի շրջանակներում ՀՀ վարչական դատավարության օրենսգրքի 158-րդ հոդվածի 5-րդ մասը ևս քննության առնելու նպատակով:  

ՀՀ վարչական դատավարության օրենսգրքի 154-րդ հոդվածի 4-րդ մասի և 158-րդ հոդվածի 5-րդ մասի սահմանադրականության հարցով միավորված գործի դատաքննությունը տեղի կունենա 2015թ. մարտի 3-ին՝ գրավոր ընթացակարգով:

Դատաքննությանը որպես պատասխանող կողմ ներգրավված է ՀՀ վարչական դատավարության օրենսգիրքն ընդունած Ազգային ժողովը: