Փաստ ինֆո

«Ես հո չեմ ուզեցել դիտավորյալ սպանել, չգիտակցելով է եղել, խմիչքի ազդեցության տակ»,-այսօր պաշտպանական ճառով հանդես գալով, ասաց մորը  ծեծելով սպանելու մեջ մեղադրվող Արմեն Չիլինգարյանը` հավելելով, որ զղջում է:

Իսկ մինչ, այդ այսօրվա դատական նիստում պաշտպանական ճառով հանդես եկավ նրա պաշտպանը՝ Կարինե Խաչատրյանը, ով հայտարարեց, թե իր պաշտպանյալն այսօր ամբաստանվում է «հանգամանքերի բերումով» և, վերլուծելով գործով դատակոչված վկաների ցուցմունքները, նշեց, թե, ամբաստանյալի կնոջից բացի, դատակոչված մյուս վկաները որևէ բացասական բան չեն հայտնել ամբաստանյալի մասին:

Պաշտպանի խոսքերով` ամբաստանյալի կինը «սևացրել է» ամբաստանյալ ամուսնուն, «վկան միգուցե համատեղ կյանքի դժվարություններից դառնացած է եղել, սակայն այդպես էլ չի հասկացել, որ ինքն էլ իր բաժին մեղքն ունի»: Նա վերցրել է երկու երեխաներին ու հեռացել տանից, անգամ ամուսնուն զրկել նրանց տեսակցելու իրավունքից:

Ըստ պաշտպանի՝  իր պաշտպանյալի կատարած արարքը ենթակա չէ որակման ՀՀ քրեական օրենսգրքի 104-րդ հոդվածի 1-ին մասով, այլ  համապատասխանում է ՀՀ քրեական օրենսգրքի 112-րդ հոդվածի  2-րդ մասի  14-րդ կետին, քանի որ ամբաստանյալը չի հասկացել, թե ինչ է կատարվել, իսկ  հետագայում,  երբ գիտակցել է, որ մայրը վատ է զգում, փորձել է օգնել նրան և շտապ օգնություն կանչել:

Ճիշտ է որակվել իր պաշտպանյալի կատարած արարքը, թե ոչ` պաշտպանը թողեց դատարանի գնահատմանը:

Հիշեցնենք, որ 45-ամյա Արմեն  Չիլինգարյանը մեղադրվում է  մորը ծեծելու մեջ, որի ժամանակ ստացած մարմնական վնասվածքներից տարեց կինը մահացել է։

Քրեական գործի նյութերի համաձայն՝ դեպքը տեղի է ունեցել 2013թ. օգոստոսի 25-ին: Իրենց տանը  որդին բռունցքներով բազմաթիվ հարվածներ էր  հասցրել  մոր կենսականորեն կարևորագույն օրգանի՝ գլխի շրջանին, և պատճառած գանգուղեղային փակ, բութ վնասվածքի հետևանքով առաջացած գլխուղեղի կենսական կարևորագույն ֆունկցիաների սուր խանգարման հետևանքով նա մահացել է:

Ամբաստանյալն այդ բնակարանում բնակվել է մոր հետ միասին, պարբերաբար գործածել ալկոհոլ, ինչի առիթով մոր կողմից արված դիտողությունների պատճառով հաճախակի ծեծի է ենթարկել նրան:

Հաջորդ դատական նիստը տեղի կունենա դեկտեմբերի 25-ին: