Փաստ ինֆո

«Հարգելի քաղաքապետ, նախքան Ձեր թեկնածությունը դնելը, նախքան այդ նշանը կպցնելը` ավելի ճիշտ, բարի լինեիք նախ կարդայիք, թե ինչ լիազորություններ ու պարտականություններ եք ունենալու»,- այսօր հրավիրված մամուլի ասուլիսում հեռակա կարգով դիմելով Եղվարդի քաղաքապետին՝ հայտարարեց Երևանի քաղաքպետարանի «Ժառանգություն» խմբակցության անդամ  Անահիտ Բախշյանը` հիշեցնելով, որ Եղվարդի մանկապարտեզի երեխաների զանգվածային թունավորումրից հետո նա հայտարարել էր, որ սննդի հետ ինքը կապ չունի:

Ինչ վերաբերում է դեպքի հանգամանքների վերաբերյալ պետական մարմինների գործելակերպին, ապա ասուլիսի բանախոսները` Անահիտ Բախշյանն ու «Իրազեկ սպառող» ՀԿ նախագահ Բաբկեն Պիպոյանը, այն մի բառով որակեցին` «ծածկադմբոց»:

Բաբկեն Պիպոյանը կարծիք հայտնեց, որ եթե առողջապահության նախարարությունը կամ ՍԱՊԾ-ն ծածկադմբոց չի արել, ուրեմն աշխատել չգիտեն: ՀԿ նախագահն իր կարծիքը հիմնավորեց նրանով, որ դեպքից շուրջ 10 օր անց էլ որևէ պաշտոնական հայտարարություն չի արվել: «Միակ կառույցը, որից ինչ-որ բան մինչև հիմա իմացել ենք, դա նախաքննական մարմինն է»,- ասաց Բաբկեն Պիպոյանը:

Անդրադառնալով սննդի մատակարարման գործընթացի նկատմամբ վերահսկողությանը՝ բանախոսները նշեցին, որ մինչ օրս չեն կարողացել բացահայտել, թե, իրենց համոզմամբ, ռիսկային համարվող կազմակերպությունների հետևում ովքեր են կանգնած:

Ռիսկային կազմակերպություններից Անահիտ Բախշյանը նշեց կոնկրետ «Հայկազունք» ընկերության անունը: «Մենք դիմել ենք պատկան կառույցներին, բայց մինչև այսօր էլ պատասխան չենք ստացել: Ո՞վ է դրա տանիքը, մինչ օրս չգիտենք»,- ասաց նա:

Բաբկեն Պիպոյանն էլ հայտարարեց. «Որևէ ընկերություն, չէր կարող նրբերշիկ մատակարարելու մրցույցթ շահել, քանի որ դա արգելված սննդամթերք է»:

«Եթե տեղյակ չեք եղել, գնացեք պարզեք, թե ով է եղել մատակակարը»,- ասաց բանախոսը` հավելելով. «Եթե իհարկե, տեղյակ չեք եղել»:

Լուսանկարը՝ PanARMENIAN Photo-ի