Փաստ ինֆո

Ամանորյա սեղանների ճոխությունն այս տարի մեր հասարակության որոշակի շրջանակներում դարձյալ կչափվի դրանց վրա ապխտած կոկորդիլոսի առկայությամբ:

Ամանորը էկզոտիկ այս երկկենցաղի համտեսմամբ դիմավորելու ավանդույթին հիմք դրվեց անցյալ տարի, երբ «ՍԱՍ» սուպերմարկետների ցանցը ԱՄՆ-ից Հայաստան ներկրեց 3 հատ ապխտած կոկորդիլոս և դրանք վաճառքի դրեց իր խանութներում:

Ի դեպ, հայտարարվում էր, որ ներմուծողը պատրաստ է նոր խմբաքանակ բերել, եթե դրա պահանջարկը լինի, բայց էկզոտիկայի սիրահարները, ըստ ամենայնի, բավարարվեցին այդ երեքով:

Այս տարի Սննդամթերքի անվտանգության պետական ծառայության հաղորդմամբ, հայկական ընկերություններից մեկը դարձյալ դիմել է իրենց և ստացել կոկորդիլոս ներկրելու իրավունք: Դարձյալ ԱՄՆ-ից, բայց արդեն ոչ թե 3, այլ 4 հատ: Ընկերությունը, փաստորեն հաշվարկել է, որ անցյալ տարվա 3-ի փոխարեն այս տարի 4 կենդանու պահանջարկ կա:

Ի դեպ, ընկերության անունը չի բացահայտվում: Դեռևս հայտնի չէ նաև, թե որ խանութներում են դրանք վաճառքի դրվելու և ինչ գնով:

Հիշեցնենք, անցյալ տարի «ՍԱՍ» սուպերմարկետում 12կգ-անոց կոկորդիլոսը վաճառվում էր 380 000 դրամով: Դոլարի անցյալ տարվա դեկտեմբերյան փոխարժեքով (405 դրամ) դա 950 դոլար էր: Հաշվի առնելով, որ բոլոր ներմուծված ապրանքների գներն աճում են դոլարի փոխարժեքի ավելացմանը զուգահեռ, թերևս ենթադրելի է, որ կոկորդիլոսներն էլ նախկին գնով չեն վաճառվի:  Հաշվի առնելով, որ 1 դրամն այսօր պաշտոնական տվյալներով 450 դրամ է, 12 կգ-անոց կոկորդիլոսների գինը թերևս կտատանվի 427 000- 430 000 դրամի սահմաններում: