Փաստ ինֆո

Լոռու մարզում փաստաբան Սամվել Շարբաթյանի սպանության աղմկահարույց գործով որոշում է կայացվել լրացուցիչ հանձնաժողովային դատաբժշկական փորձաքննություն նշանակելու մասին:

Գործի քննությունը հետաձգվել է մինչև փորձագիտական եզրակացության ստացումը:

Այդ  որոշումը դատարանը կայացրել է՝ բավարարելով մեղադրող Պ.Մարտիրոսյանի միջնորդությունը. նա մինչ դատաքննությունը ավարտվելը միջնորդել է նշանակել լրացուցիչ հանձնաժողովային դատաբժշկական փորձաքննություն՝ պատճառաբանելով, որ լրացուցիչ հարցերի պարզաբանման համար անհրաժեշտ են դատաբժշկական բնագավառի հատուկ մասնագիտական գիտելիքներ և անհրաժեշտություն է առաջացել նշանակել լրացուցիչ հանձնաժողովային դատաբժշկական փորձաքննություն:

Մասնավորապես, ըստ մեղադրող կողմի, դիակի դատաբժշական փորձաքննության եզրակացության մեջ ներառված չեն և չեն հետազոտվել դեպքի վայրի զննության արձանագրության և լուսանկարչական հավելվածի տվյալները:

Մինչդեռ դատաքննության ընթացքում պարզվել է, որ Ս.Շարբաթյանի մոտ մահվանից անմիջապես հետո դեմքի շրջանի արտաքին տեսանելի մարմնական վնասվածքներն իրենց դրսևորումներով, մինչ դիահերձման իրականացումը, որոշակի փոփոխվել են:

Մմասնավորապես՝ հարցաքննությամբ նշվել է, որ Ս.Շարբաթյանի ձախ ակնակապիճի շրջանի պարկաձև արյունահավաքը հետմահու արտափքվել է, իսկ աջ ակնակապճի շրջանում հետմահու առաջացել են արտափքված արյունահավաքներ, մինչդեռ դիակի դատաբժշկական փորձաքննության եզրակացության մեջ պարզաբանված չէ նշված արտափքումների առաջացման ստույգ մեխանիզմը:

Նման հարցադրում չի առաջադրվել և չի պարզաբանվել նաև լրացուցիչ հանձնաժողովային դատաբժշկական փորձաքննության իրականացման ընթացքում:

Բացի այդ, ըստ մեղադրող կողմի՝ դեպքի վայրի զննության արձանագրության լուսանկարչական հավելվածում Ս.Շարբաթյանի գլխի դիմային շրջանի պատկերմամբ թվով 4 լուսանկարների վրա տեսանելի են վնասվածքային փոփոխություններ նաև քթի ստորին կեսի և ծայրի, ձախ վերհոնքային՝ ճակատային, աջ և ձախ ստորկոպային շրջաններում, ինչպիսիք նկարագրված չեն դիակի դատաբժշկական փորձաքննության եզրակացության մեջ:

Դատաքննության ընթացքում պարզվել է, որ մահվանից կարճ ժամանակ անց՝ 18.11.2012թ. կատարված դեպքի վայրի զննությունից հետո մինչև 19.11.2012թ. կատարված դիակի զննությունն ու դատաբժշկական փորձաքննության իրականացումն ընկած ժամանակահատվածում, Ս.Շարբաթյանի դեմքի շրջանի վնասվածքները ենթարկվել են հետմահու փոփոխությունների, մասնավորապես՝ զարգացել են աջ ակնակապճի փափուկ հյուսվածքների արտափքված արյունահավաքներ և ձախ ակնակապիճի փափուկ հյուսվածքների պարկաձև արյունահավաքի արտափքում:

Մինչդեռ լրացուցիչ փորձաքննությանը նախաքննության ընթացքում հարցադրում առաջադրված չի եղել, թե մահվանից հետո մինչև դիակի դատաբժշկական փորձաքննության իրականացումը ընկած ժամանակահատվածում վերը նշված արտափքված արյունահավաքների զարգացումը կարո՞ղ էր արդյոք խոչընդոտ հանդիսանալ այդ և հարակից շրջաններում մահվանը նախորդած ժամանակահատվածում ստացած վնասվածքների լիարժեք նկարագրություններին, ինչպես նաև՝ վնասող ներգործությունների քանակի, առաջացման մեխանիզմների և այլ առանձնահատկությունների լիարժեք գնահատմանը:

Պաշտպանական կողմն առարկել է միջնորդության դեմ: Մասնավորապես՝ պաշտպան Ռ.Հակոբյանը հայտարարել է, որ դեմ է առհասարակ որևէ տեսակի փորձաքննության կատարմանը, քանի որ գտնում է, որ չկա երկրորդ փորձաքննություն, որը պետք է լրացվի:

Ինչ վերաբերում է լրացուցիչ փորձաքննության կատարմանը, ապա դա նշանակվում է՝ ՀՀ քրեական դատավարության օրենսգրքի 251-րդ հոդվածի համաձայն, երբ կատարվածը բավարար չափով պարզ կամ լրիվ չէ: Փորձագիտական եզրակացությունը, ըստ պաշտպանի հիմնավորումների, «ոչ թե բավարար չափով պարզ չէ կամ հիմնավորված, այլ՝ ակնհայտ սխալ, չպատճառաբանված ապօրինի եզրակացություն է»:

Նման պայմաններում խոսել լրացուցիչ հանձնաժողովային փորձաքննություն նշանակելու մասին, տեղին չէ, գտել է պաշտպանը՝ տեսակետ հայտնելով, որ ընդամենը կա միտում՝ փրկել 2-րդ եզրակացությունը:

Պաշտպան Մ.Դավթյանը նույնպես առարկել է մեղադրողի միջնորդության դեմ՝ հայտնելով, որ մահվան պատճառը պարզ է առաջին եզրակացությունից, և կարիք չկա լրացուցիչ փորձաքննության: Ամբողջ դատաքննության ընթացքում պաշտպանական կողմը առարկել է 2-րդ փորձագիտական եզրակացության դեմ, քանի որ որևէ կերպ ընդունված չէ լուսանկարներով փորձաքննություն կատարելը, ընդ որում՝ պարզ չէ, թե այդ լուսնկարները ինչպե՞ս են ի հայտ եկել:

Միայն քննիչի ցուցմունքներն են, որոնք հակասում են գործում առկա ապացույցներին: Փաստ է, որ լուսանկարչական սկավառակը անթույլատրելի ապացույց է և նորից նշանակել փորձաքննություն, որը պետք է հիմնվի այդ լուսանկարների վրա, իր կարծիքով անիմաստ է:

Հիշեցնենք, որ 2012թ. նոյեմբերի 18-ին՝ ժամը 22:00-ի սահմաններում, Լոռու մարզի Շահումյան գյուղի վարչական տարածքում գտնվող «Մուշ» ռեստորանային համալիրում հայտնաբերվել էր Սամվել Շարբաթյանի դիակը` բռնության հետքերով:

Գործով  մեղադրվում են  Արտակ Վերանյանը՝ ՀՀ քրեական օրենսգրքի 104-րդ հոդվածի 2-րդ մասի 7-րդ կետով՝ մի խումբ անձանց կամ կազմակերպված խմբի կողմից կատարված սպանություն, 258-րդ հոդվածի 4-րդ մասով՝ զենքի կամ որպես զենք օգտագործվող առարկաների գործադրմամբ խուլիգանություն, Սամվել Դիլոյանը՝ ՀՀ քրեական օրենսգրքի 104-րդ հոդվածի 2-րդ մասի 7-րդ կետով, 258-րդ հոդվածի 3-րդ մասի 1-ին կետով՝ մի խումբ անձանց կամ կազմակերպված խմբի կողմից կատարված խուլիգանություն, Արեն  Վերանյանը՝ ՀՀ քրեական օրենսգրքի 104-րդ հոդվածի 2-րդ մասի 7-րդ կետով, 258-րդ հոդվածի 3-րդ մասի 1-ին կետով: