Փաստ ինֆո

«Իմ ունեցած տեղեկություններով՝ Եղվարդի մանկապարտեզի աշխատակիցների սանգրքույկները եղել են ժամկետանց»,- այսօր հրավիրված մամուլի ասուլիսում հայտարարեց «Իրազեկ և պաշտպանված սպառող» ՀԿ նախագահ Բաբկեն Պիպոյանը:

Երևանի ավագանու անդամ Անահիտ Բախշյանն էլ հիշեցրեց, որ այդ մասին հրապարակավ հայտարարել էր հենց Եղվարդի քաղաքապետը:

«Քաղաքապետը հայտարարեց, որ վերջին անգամ 2013թ. են նրանք բուժզննում անցել»,- ասաց նա:

Բանախոսների կարծիքով՝ հարցը միայն Եղվարդի մանկապարտեզով չի սահմանափակվում: Խնդիրը պետական քաղաքականության մեջ է, ասաց Բաբկեն Պիպոյանն ու որպես օրինակ՝ նշեց այն, որ այսօր որևէ մանկապարտեզում բժիշկ չկա:

«Բուժկետում բուժքույր է նստած, պետական քաղաքականություն, որ այս երեխաների առողջությունը բժշկին վստահվի, չկա»,- ասաց նա:

Բացի այդ, ՀԿ նախագահը հայտարարեց, որ մանկապարտեզներին սնունդ մատակարարող ընկերությունների վրա օրենքով սննդի տեղափոխման ու պահպանման պայման կարգում դրված չէ:

«Սննդի շղթայի հետ շփվողը պետք է գրանցված լինի ՍԱՊԾ-ում, բայց ինքը գնում տենդերի է մասնակցում, հաղթում, հետո նոր ՍԱՊԾ-ն ասում է` ինքը մեր մոտ գրանցված չէ»,- ասաց Բաբկեն Պիպոյանը` հավելելով, որ այդ գրանցումը քաղաքապետարանը պետք է ստուգեր նախքան այդ ընկերության հայտն ընդունելը:

«Երկուսն է մեղավոր են,- ասաց բանախոսը,- մեկը մյուսի վրա է գցում, ասում է իմ առջև պահանջ դրված չէ, մյուսն էլ ասում է, երբ որ ասեն գնա բեր, կգնար կբերեր»:

Հարցին, թե որ պետական կառույցներն են պատասխանատու ստեղծված իրավիճակի համար, և պետք է վերահսկողություն իրականացներ երեխաներին մատակարարվող սննդի որակն ու մանկապարտեզի սանիտարահիգիենիկ պայմանները, Բաբկեն Պիպոյանը պատասպխանեց. «Բոլորը՝ մարզպետարան, Սննդամթերքի անվտանգության պետական ծառայություն, առողջապահության նախարարություն»:

Բանախոսները փաստեցին, որ շուրջ 70 երեխաների անվտանգության համար պատասխանատուներից որևէ մեկը դեպքից շուրջ 10 օր անց հրաժարական չի ներկայացրել և չի ազատվել աշխատանքից:

«Պահանջում ենք քաղաքապետի և մանկապարտեզի տնօրենի հրաժարականը»,- հայտարարեց Անահիտ Բախշյանն ու լրագրողներին և հասարակությանը կոչ արեց միանալ պայքարին:

«Բոլորին քարշ ենք տալու դատարան: Այն մատակարարները, որոնք առանց խղճի խայթի երեխաներին այսպիսի սնունդ են տալիս, որի հետևանքով երեխաները հիվանդանոցում են հայտնվում, պետք է գոնե այս անգամ պատասխանատվություն կրեն»,- ասաց Անահիտ Բախշյանը: