Փաստ ինֆո

Եռյակում արտաքին քաղաքականության առանձին հարցերի վերաբերյալ կարծիքները կարող են տարբերվել, և ԵՏՄ-ին Հայաստանի միանալու հարցում եռյակի մաս կազմող քաղաքական ուժերի` «Ժառանգություն», «Բարգավաճ Հայաստան»-ի, «Հայ ազգային կոնգրես»-ի, տարբեր դիրքորոշումները չէին կարող եռյակից «Ժառանգության» դուրս գալու պատճառ դառնալ:

Այս մասին այսօրվա ճեպազրույցում հայտարարեց Ազգային ժողովի «Ժառանգություն» խմբակցության ղեկավար Ռուբիկ Հակոբյանը` վստահեցնելով, որ «Ժառանգություն»-ը շարունակում է մնալ եռյակի կազմում:  

«Այս ուժերին միավորող թիվ մեկ հարցը իշխանափոխությունն էր, որը պետության մեջ պետք է պայմաններ ստեղծեր, որ յուրաքանչյուր քաղաքական ուժ քաղաքական սպեկտրում զբաղեցնի իր նիշան` ժողովրդավարության պայմաններում: Հետագայում ի՞նչ զարգացումներ տեղի կունենան` ես կդժվարանամ ասել, բայց նաև այս պահին ես հայտարարում եմ, որ  «Ժառանգություն»-ը շարունակում է գործել եռյակի ձևաչափով»,- ասաց Ռ.Հակոբյանը:

Ինչ վերաբերում է նախօրեին խորհրդարանում հիշյալ պայմանագրի քվեարկությանը, ապա, ըստ Ռ.Հակոբյանի, ցավոք, այն «կուսակցական կոնյուկտուրային» էր:

Ըստ նրա` հասկանալի էր, որ խորհրդարանը կողմ էր քվեարկելու ԵՏՄ-ին Հայաստանի միանալուն, այդ միավորմանը կողմ է նաև հասարակության մեծ մասը, բայց, եթե քաղաքական մեծամասնության պատգամավորներին թույլ տրվեր քվեարկել խղճի կամոք, «դեմ» ձայները 4-5 անգամ ավելի կլինեին:

Ռ.Հակոբյանի համոզմամբ` «պետության հեղինակությունը, քաղաքական անվտանգությունը, պետության արժանապատվությունը միջազգային ամբիոններում պաշտպանելու համար անհրաժեշտ է, որ Հայաստանը գոնե ունենար 30-40 «դեմ» ձայն»:

«Ժառանգության» և անձամբ Ռ.Հակոբյանի համար շարունակում է մտահոգիչ մնալ Արցախի հետ հնարավոր մաքսային սահմանակետի տեղադրումը:

«Արցախի թե՛ քաղաքական, թե՛ տնտեսական անվտանգության հիմնական երաշխավորը Հայաստանն է, և Հայաստանը շատ հստակ պետք է արձանագրեր այդ փաստաթղթում, թե ո՞րն է լինելու Արցախի կարգավիճակը, որովհետև եթե ժամանակի հետ, շատ սպասելի է, Ղազախստանը, Բելառուսը կամ ղրղզները բարձրացնեն հարց` պաշտպանելով, իհարկե, Ադրբեջանի շահերը, որպեսզի մաքսակետ լինի Հայաստանի և Արցախի միջև, որևէ միջազգային պայմանագրով մենք չենք կարող հակառակվել դրան»,- ասաց Ռ.Հակոբյանը: