Փաստ ինֆո

Ազգային ժողովի «Հայ ազգային կոնգրես» խմբակցության ղեկավար Լևոն Զուրաբյանը որոշել է այսուհետ զգուշությամբ բարևել:
Այս մասին նա հայտնեց այսօրվա ճեպազրույցում` պարզաբանելով, թե ինչով է դա պայմանավորված:

Ըստ նրա` երեկ իշխանությունները` ի դեմս Էդուարդ Շարմազանովի և Արմեն Աշոտյանի, հայտարարել են, որ ԵՏՄ-ին միանալու մասին պայմանագրի քվեարկության արդյունքները վկայեցին, որ ընդդիմությունը սատարում է Սերժ Սարգսյանի վարած քաղաքականությանը:

Այս կապակցությամբ նա հեգնեց, թե դրանից մեկ-երկու օր առաջ խորհրդարանի միջանցքում պատահաբար հանդիպել է և սեղմել այս երկու հանրապետական գործիչների մեկնած ձեռքերը, և այժմ մտածում է, որ դա ևս կներկայացվի որպես Սերժ Սարգսյանի քաղաքականությանը սատարելու քայլ:

«Ուրեմն` ինչքան ողորմելի, խեղճ վիճակում են հայտնվել իշխանությունները, որ կարճում են այսպիսի բաներից և փորձում են ժողովրդին ֆռցնել»,- հայտարարեց Լ.Զուրաբյանը` հավելելով, որ ստիպված է հատուկ Է.Շարմազանովի և Ա.Աշոտյանի համար հանդես գալ հայտարարությամբ, որ չի կարող սատարել Սերժ Սագսյանի վարած ո'չ ներքին և ո'չ էլ արտաքին քաղաքականությունը:

Հաշվի առնելով, որ պայմանագրի վավերացման հարցը կարող է կապվել արտաքին քաղաքականության հետ համաձայն լինելուն, ապա, ըստ Լ.Զուրաբյանի, «Սերժ Սարգսյանի արտաքին քաղաքականության մեջ հայտնի է այսպես կոչված նախաձեռնողական քաղաքականությամբ»` ընդգծելով, որ կան երկու կարևոր նախաձեռնություն, որ նա իրականացրել է արտաքին քաղաքականության մեջ, «մնացածում նա ուղղակի շարունակել է այն, ինչ որ մինչ իրեն արվել է` լավ, թե վատ»:

Ըստ Լ.Զուրաբյանի` նախաձեռնողական քաղաքականության շրջանակներում Սերժ Սարգսյանի իրականացրած երկու նախաձեռնություններից առաջինը հայ-թուրքական արձանագրություններն են` «այսպես կոչված ցյուրիխյան ուրացումը, որտեղ հայթուրքական սահմանը բացելու Թուրքիայի խոստումների դիմաց, ըստ էության, վաճառվել է Հայոց  ցեղասպանության ճանաչումը»:

Երկրորդ նախաձեռնությունը, ըստ Լ.Զուրաբյանի, «եվրոասոցացման գործընթացն էր, որ երեք տարի բանակցություններ տարվեցին, մեր մաբողջ դիվանագիտական կորպուսը մասնակցեց դրան, մեծ հույսեր էին կապում, ԵՄ-ին տրվեցին բազմաթիվ խոստումներ, արդյունքում՝ այդ ամենը ամենախայտառակ ձևով ձախողվեց»: