Փաստ ինֆո

Եղվարդի մանկապարտեզում տասնյակ երեխաների վարակի ամենահավանական աղբյուրը կաթնամթերքն է:

«Փաստինֆո»-ին հայտնի է դարձել, որ զանգվածային թունավորման դեպքի գրանցման օրը մանկապարտեզում երեխաները կաթնամթերք են կերել: Կարծիք կա նաև, որ այն մանկապարտեզն ստացել է ոչ թե արդեն վարակված, այլ վարակը փոխացվել է տեղում՝ մեղմ ասած՝ ոչ այնքան մաքուր ամանեղենից: Ի դեպ, այս վարկածի օգտին է խոսում նաև այն հանգամանքը, որ ինչպես այսօր առողջապահության նախարարն էլ հայտարարեց, դիզինտերիան, որն ախտորոշվել է վարակված երեխաների մոտ, «կետոտ ձեռքերի հիվանդություն է»:

Մեկ ուշագրավ հանգամանք ևս. մեզ հայտնի է դարձել նաև, որ վարակից օրեր առաջ առողջապահության նախարարության հիգիենիկ եւ հակահամաճարակային տեսչության փորձագիտական կենտրոնի (սանէպիդկայան) աշխատակիցները եղել են Եղվարդի թիվ 1 մանկապարտեզում: Ավելին՝ նրանք այնտեղ նույնիսկ դիզինտերիայի հարուցիչներ են հայտնաբերել, բայց համապատասխան արձանագրություն չեն կազմել՝ թույլ տալով, որ իրենց թերացումը10-յակ երեխաների հիվանդության պատճառ դառնա:

Ի դեպ, սա այս պատմության մեջ պետական մարմինների թերացման միակ փաստը չէ:

Ինչպես այսօր հայտարարեց առողջապահության նախարարը, դեռևս 2013թ. հրամանով՝ մանկապարտեզներում արգելվել է ցանկացած տեսակի երշիկեղենը, բայց, չնայած դրան, արդեն իսկ հայտնի փաստ է, որ նախորդ օրը մանկապարտեզի ճաշացանկում նրբերշիկն առկա է եղել` «Մուշ»-ի արտադրած: Հանուն ճշմարտության արձանագրենք, որ եթե այս ընկերության նրբերշիկը վտանգավոր հարուցիչներ պարունակեր, ապա նման ախտանիշներ կնկատվեին ոչ միայն երեխանրի, այլ ընդհանրապես շատերի մոտ, քանի որ արտադրանքն իրացվում է շատ տարբեր խանութներում եւ հաստատություններում:

Բայց սա հարցի մի կողմն է: Նրբերշիկի օգտագործումը մանկապարտեզներում արգելված է եւ ի հեճուկս նախարարի հրամանի դրա օգտագործումն արդեն իսկ անընդունելի է:

Ի վերջո, ուղղակի անընդունելի է այն, որ միայն մանկահասակ երեխաների առողջությունը վտանգելու գնով է պարզվում, որ մանկապարտեզներում նախարարի հրամանը չի կատարվում, որ մաքրության նկատմամբ հսկողությունը բացակայում է, նույնիսկ հայտնաբերվելու դեպքում վարակի տարածումը կանխելու քայլեր ինչ-ինչ պատճառով չեն ձեռնարկվում, որ մարզպետարանն իր պատասխանատու ստորաբաժանումներով հանդերձ այս մանկապարտեզի ու այնտեղ ամեն օր իրենց օրն անցկացնող երեխաների մասին հիշում են միայն այն ժամանակ, երբ այնտեղ քրեական հանցանք կամ զանցանք է տեղի ունենում, երբ երեխաները ծանր վիճակով հոսպիտալացվում են, երբ հարուցվում է քրեական գործ:

Թերևս այդպես ավելի հեշտ է աշխատելը: Ու հիմա ինչ-որ բան անելու փոխարեն՝ լրագրողների բոլոր հարցերին, բոլոր այս պետական կառույցները միաբերան պատասխանում են՝ քրեական գործի նախաքննությունը կավարտվի, ամեն ինչ կպարզվի, մեղավորները կբացահայտվեն:

Պարոնա՛յք, մի՞թե ձեր ամենօրյա աշխատանքով զբաղվելու, ձեր աշխատանքային պարտականությունները ժամանակին ու պատշաճ կատարելու համար անպայման պետք է քրեական գործ հարուցվի:

Հեղինակ` Նելլի Դանիելյան