Փաստ ինֆո

ԵՏՄ անդամակցություն, նոր տնտեսական իրողություններ, դրամի կտրուկ ու շարոնակական արժեզրկում. Սրանք են այն գործոնները, որոնցով մասնագետները պայմանավորում են Հայաստանում վերջին շրջանում գրանցված թանկացումները:

Շարքային սպառողին, սակայն, ավելի շատ հետաքրքրում է ոչ թե պատճառը, այլ՝ հետևանքը:

Այսօր առավոտյան մայրաքաղաքում տեղացած ձնից բացի, երևանցիներին տհաճ անակնկալ էր սպասվում նաև խանութներում: Մի գիշերվա ընթացքում այսօր հերթական անգամ թանկացել են առաջին անհրաժեշտության գրեթե բոլոր պարենային ապրանքները:

Մթերային խանութներում կատարած մեր հարցումների արդյունքում պարզեցինք, որ այսօր առավոտյան մատակարարված գրեթե բոլոր ապրանքների գները փոխված են եղել:

«Ամենաշատը սուրճն է թանկացել. 1կգ-ն այսօր 100 դրամով թանկ ենք ստացել»,- մեզ հետ զրույցում հայտնեց մթերային խանութներից մեկի վաճառողուհին, ով մեր այցելության պահին նոր` թանկացած գնապիտակներն էր լրացնում:

Մեկ այլ խանութում էլ ասացին, որ թանկացել է «Անկոր» կարագը: «Ամեն ինչն էլ թանկացել է՝ 30, 50, 100 դրամով»,- ասաց վաճառողուհին ու հավելեց. «Արդեն մի ամիս է, ամեն նոր խմբաքանակը նախորդից թանկ ենք ստանում, միայն հնդկաձավարի 1 կգ-ը մի ամսվա ընթացքում 1000 դրամից դարձել է 1900 դրամ»:

Ի դեպ, հավասարապես թանկացել են ինչպես ներկրված ապրանքները, որոնց վրա կարող էր ազդել վերջին շրջանի արտարժույթի փոխարժեքի բարձրացումը, այնպես էլ՝ տեղական արտադրատեսակները, որոնց սեփականատերերը, թերևս այսպիսով փորձում են ապահովագրել իրենց բիզնեսը հնարավոր ռիսկերից:

Դե իսկ սապառողներին հնարավոր ռիսկերից ապահովելու գործառույթ ունեցող պետական մարմիններն այս պահին դեռևս պաշտոնապես որևէ գնահատական չեն տվել տեղի ունեցող գնաճին: Իսկ գնաճը զսպելու իրավասությամբ օժտված Կենտրոնական բանկից, մեր հարցին ի պատասխան, հայտնեցին, որ եռամսյակային վերջին դիտարկման (3-րդ եռամսյակ) արդյունքում արձանագրվել է, որ գնաճը գտնվում է հայտարարված 4 ±1-ի միջակայքում:

Ինչ վերաբերում է հոկտեմբեր- նոյեմբեր- դեկտեմբեր ամիսներին գրանցված ու գրանցվող գնաճին, այս մասին ԿԲ-ի մեր զրուցակիցը որևէ հստակ պատասխան չտվեց` հիշեցնելով, սակայն, որ ԿԲ-ն պատասխանատվություն է կրում ոչ թե սպառողական գների, այլ՝ դրանց ինդեքսի աճի համար, որը դեռ նորմայի սահմաններում է:

Թե ինչ ազդեցություն կունենա գնաճը շարքային սպառողի կենսամակարդակի վրա և ինչպես կարտահայտվի այն սպառողական զամբյուղի կառուցվածքի ու արժեքի վրա, պաշտոնապես հայտնի կդառնա միայն դեկտեմբերի վերջին կամ հունվարի սկզբին, իսկ մինչ այդ ուղղակի հիշեցնենք, որ հունվարի 1-ից աշխատավարձերի համընդհանուր բարձրացում Հայաստանում չի սպասվում, իսկ կենսաթոշակներն ավելանալու են ընդամենը 2-4 հազար դրամով: