Փաստ ինֆո

«Թրանսփարենսի Ինթերնեշնլ հակակոռուպցիոն կենտրոն» ՀԿ-ի ներկայացուցիչ, փաստաբան Տիգրան Հայրապետյանը բավարարված է Բյուրեղավանի գիշերօթիկ դպրոցի տնօրենի նկատմամբ նախաքննական մարմնի կատարած քննչական գործողություններից:

Այս մասին փաստաբանը հայտնեց «Փաստինֆո»-ի հետ զրույցում՝ նշելով, որ այս մասով հստակ երևում է նախաքննական մարմնի կատարած աշխատանքը: «Հեշտ չէ բացահայտել 28 աշխատակիցներին, ովքեր գրանցված են եղել, բայց չեն աշխատել: Հասկանալի է՝, որ դա դժվար բացահայտվող փաստ է, բայց ամեն դեպքում, իրենք բացահայտել են»,- ասաց փաստաբանը` միաժամանակ հավելելով, որ 28 աշխատակիցների անվան տակ դուրս գրված աշխատավարձը, իր կարծիքով սակայն, պիտի որ ավելի մեծ թիվ կազմած լիներ:

Հիշեցնենք` «Թրանսփարենսի Ինթերնեշնլ հակակոռուպցիոն կենտրոնը» դատարան է դիմել՝ Բյուրեղավանի գիշերօթիկ դպրոցում հայտնաբերված անօրինությունների վերաբերյալ հանցագործության մասին հաղորդումը պատշաճ քննության չենթարկելու, գործի բազմակողմանի, օբյեկտիվ և լրիվ քննություն չիրականացնելու և նշված հանգամանքների շուրջ դատախազական պատշաճ վերահսկողություն չիրականացնելու մասին բողոքով:

Մինչ դատավարության մեկնարկը, սակայն, ՀՀ քննչական կոմիտեն հայտարարեց, որ Կոտայքի մարզի քննչական բաժնից գործի քննությունը տեղափոխվել է Քննչական կոմիտեի ՀԿԳ վարչության վարույթ: Իսկ դրանից օրեր անց հայտարարվեց, որ գիշերօթիկի նախկին տնօրեն Գայանե Մարգարյանին մեղադրանք է առաջադրվել՝ ավելի քան 50 մլն դրամի յուրացման համար, և նա կալանավորվել է:

Մեր հարցին, թե հնարավո՞ր է, որ կազմակերպությունն այս առաջընթացից հետո հրաժարվի դատարան ներկայացրած իր հայցից, փաստաբան Տիգրան Հայրապետյկանը պատասխանեց. «Այս փուլի համար ես գտնում եմ, որ գործի ընթացքը նորմալ է, ես կխոսեմ մնացած հասարակական կազմակերպությունների հետ, եթե իրենք նման կարծիք ունեն, մյուս դատական նիստին հնարավոր է, որ միջնորդենք, որ ինչ-որ առումով հետաձգվի, որովհետև այս պահին չենք ուզում խանգարել վարույթն իրականացնող մարմնին: Մեր բողոքն ինքնանպատակ չէ, եթե աշխատում են, շատ լավ է: Պետք է սպասել, հետո եթե այլ չգոհացնող բաներ լինեն, կարելի է քայլեր ձեռնարկել»,- ասաց փաստաբանը:

Այդուհանդերձ, Տիգրան Հայրապետյանի համոզմամբ, նախաքննական մարմինը դեռ շատ անելիք ունի:

«Նախաքննությունը պետք է դեռ շարունակվի և քրեաիրավական գնահատականներ տրվեն,- ասաց փաստաբանն ու հավելեց,- Երեխաների նկատմամբ ծեծի, բռնության, նախարարության աշխատակիցների հետ կապված եղե՞լ են չարաշահումներ, թե՝ ոչ, ինչպիսի՞ չարաշահումներ են եղել, ովքե՞ր են կատարել այդ չարաշահումները»:

Իսկ քրեական գործի նախաքննության մեջ կատարված լուրջ քայլերը Տիգրան Հայրապետյանը պայմանավորում է գործի հասարակական հնչեղությամբ, մամուլի դրսևորած հետևողականությամբ:

«Շատ մեծ հանցագործություն է կատարվել, բայց ամեն ինչ սառեցված մնում էր: Հենց հանրությունը 7 ամիս առաջ ակտիվացավ, քրեական գործ հարուցվեց, մարդիկ աշխատանքից դուրս եկան, հիմա էլ ակտիվացավ, անցավ մի շաբաթ, և մենք հետևանքները տեսանք ու, կարծում եմ, դեռ առաջկայում էլ կտեսնենք»,- ասաց նա:

Հիշեցնենք՝  որ գիշերօթիկ դպրոցում տիրող բարքերի ու վարքերի մասին բաց նամակ էր հրապարակվել  մամուլում, որից հետո ՄԻՊ-ն իրականացրեց ուսումնասիրություններ՝ արձանագրելով չարաշահումներ։

Ահազանգումների հետքերով գիշերօթիկ էր այցելել վարչապետ Հովիկ Աբրահամյանը և խիստ նկատողության արժանացրել Աշխատանքի և սոցիալական հարցերի փոխնախարար Ֆիլարետ Բերիկյանին՝ դպրոցում առկա խախտումները ժամանակին չարձանագրելու համար: Աշխատանքից հեռացվել էր նաև գիշերօթիկ դպրոցի տնօրեն Գայանե Մարգարյանը, ով ներկայում կալանավորված է: