Փաստ ինֆո

Խոսակցությունները, թե «Նիվա»-ի վարորդը բաց է թողել դեպի Աշտարակ տանող խաչմերուկը, մեքենան վարել է դեպի հետ, որ շրջադարձ անի, Վարդան Պետրոսյանի ավտոմեքենայի վթարի գործով տուժողների շահերի ներկայացուցիչ Ռուբեն Բալոյանի համոզմամբ, ավելորդ են, «եթե վթարը տեղի է ունեցել կողնակում»:

Վարդան Պետրոսյանը դատարանում ցուցմունք տվեց, որ «Նիվա»-ն կտրուկ հետ է ընթացել: «Ընդունենք բանուկ մասով դանդաղ հետ է գալիս, պիտի գաս հետևից խփես»,- ասաց Ռուբեն Բալոյանը:

Տուժող կողմի ներկայացուցիչն այսօր դատարանում հայտարարեց նաև, որ էական չէ, թե վթարի հետևանքով ավտոմեքենայի կոնկրետ որ մասն է առաջացրել տուժողների մահը:

Վկայակոչելով դատաբժշկական փորձաքննության եզրակացությունը՝ տուժողների ներկայացուցիչը հայտարարեց, որ երկու երեխաների մարմինների վրա կտրած, ծակած վերքեր չեն հայտնաբերվել:

«Բախումն այնքան ուժեղ է եղել, որ երեխաների ներքին օրգանները տրաքել են: Սա խոսում է այն մասին, որ արագությունը շատ բարձր է եղել»,- ասաց Ռուբեն Բալոյանը՝ պատասխանելով Վարդան Պետրոսյանի փաստաբան Նիկոլայ Բաղդասարյանի առաջ քաշած այն վարկածին, թե «Նիվայի» հետևի նստարանին նստած երեխաների մահվան պատճառ է դարձել հատկապես դրա բեռնախցիկում տեղադրված գազի բալոնի տեղաշարժը:

Ռուբեն Բալոյանը դատարանին հիշեց նաև, որ Վարդան Պետրոսյանը վթարի առաջացման հետևանքների մասին ոչ մի հարցի դատարանում չի պատասխանել՝ հրաժարվելով ցուցմունք տալուց:

Այսպիսով, Ռուբեն Բալոյանը դատարանին խնդրեց մերժել Վարդան Պետրոսյանի պաշտպանի միջնորդությունը՝ կրկնակի փորձաքննություններ իրականցնելու մասին:

Ավարատելով իր խոսքը՝ տուժողների ներկայացուցիչ Ռուբեն Բալոյանը ուշագրավ հայտարարություն արեց. «Ես հանդիպել եմ տուժողների հետ, խնդրել, որ կողմերը հաշտության եզրեր գտնելու ուղիներ ձեռնարկեն: Շուրջ 2 ժամ զրուցել եմ տուժողների հետ և կարծում եմ, որ ժամանակն է, որ այս ամեն ինչին վերջակետ դրվի»: