Փաստ ինֆո

«Ավարտվեց հերթական քաղաքական աշունը, որը նախորդ աշուններից առանձնապես չտարբերվեց եւ այդպես էլ չթեժացավ:
Ինչպես ասում են, իշխանություններն աշխատում են, ընդդիմությունը՝ քննադատում, երբեմն էլ` անհարկի աղմկում»,- Ազգային ժողովի հայտարարությունների ժամին իր ելույթում մասնավորապես նշեց ԱԺ փոխնախագահ Էդուարդ Շարմազանովը:

Նա վստահեցրեց, որ իշխանությունների օրակարգը ամբողջական է եւ միտված է բարեփոխումների միջոցով երկրի զարգացմանը: «Ի տարբերություն իշխանությունների՝ քաղաքական որոշ ուժեր այդպես էլ չձեւավորեցին՝ թե՛ ներքին, թե՛ արտաքին քաղաքական միասնական օրակարգ»,- ընդգծեց նա:

Անդրադառնալով խորհրդարանում երեկ մեկնարկած Եվրասիական տնտեսական միությանը Հայաստանի անդամակցման պայմանագրին հավանություն տալու հարցի քննարկմանը՝ Է.Շարմազանովը հայտարարեց.

«Մեր համոզմամբ՝ այդ միությանն անդամակցելը դրական է եւ բխում է մեր պետության շահերից: Ավելին՝ թե՛ որոշ ընդդիմադիր առաջնորդների հրապարակային հայտարարությունները, թե՛ գլխադասային հանձնաժողովում հարցի քննարկումներն ու քվեարկությունը ցույց տվեցին, որ խորհրդարանում առկա քաղաքական ուժերի մեծամասնությունը կողմ է իշխանությունների այս որոշմանը, այդ թվում նաեւ այն ուժերը, որոնց ներկայացուցիչները 2013 թվականի սեպտեմբերի 3-ից հետո իրար հերթ չտալով փորձում էին քննադատել մեզ»:

Ըստ ԱԺ փոխնախագահի՝ հետեւությունը մեկն է. «Այսօր նրանք էլ իրենց քաղաքական վարքագծով ապացուցեցին, որ Նախագահ Սարգսյանի գլխավորությամբ իշխանությունների որոշումը անդամակցելու Եվրասիական տնտեսական միությանը բխում է մեր պետական շահերից եւ արվել է ճիշտ ժամանակին»:

ԱԺ փոխնախագահը չշրջանցեց  նաև Հայոց ցեղասպանության 100-ամյակին ընդառաջ Թուրքիայի շարունակվող ժխտողականության քաղաքականությունը.

«Դրա վկայությունն է Թուրքիայի արտգործնախարար Մեւլութ Չավուշօղլուի վերջերս արված հայտարարությունը, համաձայն որի՝ Թուրքիան խոչընդոտելու է Ցեղասպանության ճանաչման գործընթացը:

Չնայած նրանց գործադրած ջանքերին՝ այնուհանդերձ կան եւ կլինեն երկրներ, որոնք հանդիսանում են մարդու իրավունքների պաշտպանության իրական ջատագովներ: Վառ ապացույցը Բոլիվիան է, որի խորհրդարանի զույգ պալատների կողմից  նախօրեին միաձայն դատապարտվեց Հայոց ցեղասպանությունը եւ այն ժխտող քաղաքականությունը: Համոզված եմ, որ մարդկության դեմ իրագործված ոճիրները  պետք է դատապարտվեն, քանի որ ժխտողականությանը միտված ցանկացած գործողություն նույնքան հանցավոր է, որքան ոճրագործությունը»: