Փաստ ինֆո

Վարդան Պետրոսյանի գործով մեղադրող դատախազ Արթուր Սարգսյանը դեմ է նրա պաշտպանի կողմից նախորդ դատական նիստում ներկայացրած միջնորդությանը՝ կրկնակի հանձնաժողովային ավտոտեխնիկական և դատահետքաբանական փորձաքննություն իրականացնելու մասին:

Այս մասին այսօր դատախազ Սարգսյանը հայտարարեց Կոտայքի մարզի ընդհանուր իրավասության դատարանում կայացած հերթական դատական նիստի սկզբում՝ իր տեսակետը հիմնավորելով նրանով, որ, անկախ կողմերի կարծիքներից, դատարանը որոշում պետք է կայացնի ձեռք բերված ապացույցների հիման վրա:

Դատախազը նաև նշեց, որ փորձագետների տված եզրակացության համաձայն՝ ճանապարհային երթևեկության կանոննների խախտմանը հանգեցրել է արագության գերազանցումը:

«Փորձագետները, վերլուծելով արագությունը և համարելով, որ այդ արագությունը չի համապատասխանում տվյալ իրավիճակում ապահով երթևեկությանը, հանգել են նաև եզրակացության, որ դրանով իսկ խախտվել են օրենքի պահանջները»,- ասաց դատախազն ու հավելեց, որ այս մասով ևս, իր կարծիքով, չկա լրացուցիչ փորձաքննության կարիք: Բացի այդ, նրան խոսքով՝ «արագության մասին գործի նյութերում կան համապատասխան ցուցմունքներ»:

Ինչ վերաբերում է «Նիվա» մակնիշի ավտոմեքենայում տեղադրված գազի բալոնի վերաբերյալ Վարդան Պետրոսյանի պաշտպան Նիկոլայ Բաղդասարյանի՝ նախորդ դատական նիստում ներկայացրած միջնորդությանը, մեղադրող դատախազը նշեց, որ թեև դրա օրինականությունը նախաքննական մարմնի կողմից չի ուսումնասիրվել, բայց տուժողը ներկայացրել է փաստաթղթեր, որով իրեն թույլ է տրվել ավտոմեքենայի վրա գազի բալոն տեղադրել:

Իսկ այն հարցի մասին, որ «Նիվա»-ի մեջ նստած երեխաների մահը վրա է հասել հատկապես գազի բալոնի տեղաշարժվելու հետևանքով առաջացած մարմնական վնասվածքներից, ապա, դատախազի խոսքով, այս հարցը վթարի պատճառների հետ անմիջական կապ չունի:

«Եթե բալոնը ինքնաբերաբար չի շարժվել, կամ չի պայթել, դա չի կարող պատճառ հանդիսանալ սույն վթարի առաջացման համար»,- հայտարարեց դատախազը՝ հավելելով, որ կանոնների խախտումը պետք է պատճառական կապ ունենա վթարի հետ: