Փաստ ինֆո

«Հիացած եմ Ձեր կարողությամբ` շատ ծավալուն անդրադարձ կատարելով, այնուամենայնիվ, հարցերն անպատասխան թողնել»,- այսօր Ազգային ժողովում` ԵՏՄ-ի մասին պայմանագրին Հայաստանի միանալու հարցի քննարկման ժամանակ, հիմնական զեկուցող` ՀՀ ֆինանսների փոխնախարար Սուրեն Կարայանին հարց ուղղելուց առաջ նկատեց «Ժառանգություն» խմբակցության անդամ, նախկին արտգործնախարար Ալեքսանդր Արզումանյանը:

Ա.Արզումանյանը որպես ասվածի հիմնավորում նշեց, որ վերջին երկու շաբաթների ընթացքում փոխնախարարի հետ բազմիցս առիթ են ունեցել քննարկելու` թե՛ փակ, թե՛ բաց և թե՛ ընդլայնված ձևաչափերով, որոնց ժամանակ իր գործընկերները բազմաթիվ հարցեր են ուղղել:

Ըստ պատգամավորի՝ ի պատասխան հնչած հարցերի՝ «անընդհատ կրկնելով, որ սա քաղաքական միություն չի, զուտ տնտեսական է, այնուամենայնիվ, մեր կասկածները չեն փարատվում, և գործողությունները, զարգացումները ցույց են տալիս, որ պրոբլեմներ կան»:

Ա.Արզումանյանը նկատեց, որ «Հայ ազգային կոնգրես» խմբակցության անդամ, նախկին վարչապետ Հարնտ Բագրատյանի հարցին ի պատասխան՝ փոխնախարարը, մասնավորապես, ասաց, թե ԵՏՄ-ին Հայաստանի միանալու դեպքում կբարելավվի բիզնես մթնոլորտը, հաշվի առնելով, որ հնարավորություն է ընձեռվում մուտք գործել 180 միլիոնանոց շուկա:

«Համաձայն Բլումբերգ գործակալության կողմից միջազգային խոշոր ներդրողների շրջանում անցկացված հարցման`
հարցվածների 50 տոկոսը Ռուսասատանը համարում են համաշխարհային ֆինանսական շուկաների թիվ մեկ սպառնալիքը: Համեմամտության համար, Իսլամական պետությունը սպառնալիք են համարում 26 տոկոսը»,- ասաց Ա.Արզումանյանը` հավելելով, որ Ռուսաստանն իր տարբեր պետական մարմինների միջոցով, օրինակ, արգելում է մեկ տասնյակ ընկերություններին մթերք մատակարարել, սահմաններում մաքսային զննումներ կատարել:

«Այսինքն` որևէ հեռանկարային զարգացում չենք տեսնում. Մարդիկ կարող են վոլյունտարիստական ցանկացած լուծում գտնել»,- ասաց պատգամավորը` հարց ուղղելով փոխնախարարին, թե ինչպե՞ս է նա պատկերացնում, որ այս պայմանններում որևէ մեկը ներդրում անի Հայաստանում՝ հաշվի առնելով, որ, «նախ՝ Ռուսաստանը սպառնալիք է համարվում իրենց իսկ կողմից, և եկրորդը`որ ցանկացած գերատեսչություն ցանկացած պահի կարող է վերանայի այն որոշումը, որ կայացվել է ԵՏՄ ամենաբարձր մակարդակի կոլեգիալ մարմիններում»:

Ա.Արզումանյանի` իր հասցեին հնչած գնահատականի հետ Ս.Կարայանը, բնականաբար, չհամաձայնեց, նշելով, որ նիստի սկզբից ի վեր փորձում է «պատասխանել պատգամավորների հարցերին, որոնց մեծ մասը վերաբերում է նրան, թե ինչ հնարավորություններ կարող են ստեղծվել, որպեսզի ՀՀ-ում ներդրւոմներն աճեն»: Փոխնախարարը կրկին պնդեց, որ ներդրումների համար ամենակարևոր հանգամանքներից մեկը գործարար միջավայրի և առհասարակ տնտեսության բարելավման գնահատականն է:

«Ես չեմ կարծում, որ երբ ՀՀ-ն միանում է Եվրասիական տնտեսական միությանը, որոշակի սահմանափակումներ է կրում: Ո'չ: Ընդամենը հնարավորություններ է ստանում ու ավելի լայն հնարավորություններ, քան կան այսօր: Եվ չեմ կարողանում կիսել այն մտահոգությունը, որ մենք, միանալով ԵՏՄ-ին, չկրելով որևէ սահմանափակումներ, մեր ներդրողները պետք է պակասեն»,-հայտարարեց Ս. Կարայանը: