Փաստ ինֆո

«Մեր տնտեսությունը շատ սերտ կապ ունի Ռուսաստանի տնտեսության հետ, և այն բացասական ազդեցությունները, որոնք կարող են նկատվել, անկախ նրանից մենք կանդամակցենք ԵՏՄ-ին, թե՝ ոչ, իրականում տեղի կունենան»,- պատասխանելով ՌԴ տնտեսական վիճակի ներկայիս պայմաններում այդ երկրի կողմից ստեղծված տնտեսական կառույցին` ԵՏՄ-ին, անդամակցելու նպատակահարմարության մասին «Փաստինֆո»-ի հարցին, ասաց ֆինանսների փոխնախարար Սուրեն Կարայանը:

Ավելին` փոխնախարարի խոսքով՝ այդ միությանը միանալը մեր երկրի համար շատ լավ հնարավորություններ է ստեղծոմ:

«Մեր տնտեսության համար դա հնարավորություն է ունենալու կայուն տնտեսական աճ,- կանխատեսեց մեր զրուցակիցն ու հավելեց,- չեմ կարծում, որ Ռուսաստանի հանդեպ կիրառված պատժամիջոցները բացասական ազդեցություն կունենան Հայաստանի վրա»:

Ֆինանսների փոխնախարարի խոսքով՝ միակ բացասական ազդեցությունըՀայաստանի տնտեսության վրա կարող է լինել ՌԴ-ից ներմուծման ծավալների կտրուկ անկումը, սակայն, ըստ նրա, առաջիկա տարվա համար մասնագիտական շրջանակներն «այդպիսի կտրուկ նվազում չեն կանխատեսում»:

«Չի կանխատեսվում նաև տնտեսության անկում Ռուսաստանում»,- ասաց Սուրեն Կարայանը:

Անդրադառնալով ռուսական ռուբլու փոխարժեքի՝ վերջին շրջանում գրանցված կտրուկ անկման խնդրին՝ մեր զրուցակիցը պատասխանեց. «Այո՛, այդ խնդիրը կա, բայց մենք հույս ունենք, որ մոտ ժամանակներս այն կկայունանա»:

Բայց նույնիսկ այսօրինակ տատանումների դեպքում ԵՏՄ-ին անդամակցության պարագայում, ֆինանսների փոխնախարարի համոզմամբ, մեր արտահանողների ռիսկերն ավելի քիչ կլինեն: