Փաստ ինֆո

Սյունիքի մարզպետի առանձնատան մոտ միջադեպի գործի շրջանակում փաստաբան Հայկ Ալումյանը  վերաքննիչ բողոք է ներկայացրել, որով պահանջում է վերացնել նախաքննական մարմնի որոշումը Զարզանդ Նիկողոսյանի նկատմամբ  քրեական հետապնդում չիրականացնելու մասին:  Մարզպետի ավտոմեքենայում  Ավետիք Բուդաղյանին ծեծի ենթարկելու դրվագի վերաբերյալ դեպքն, ըստ  Հայկ Ալումյանի, սխալ է նկարագրված:

Նշենք, որ նախաքննական մարմինը հաստատված է համարել  այդ դրվագում բացառապես Զարզանդ Նիկողոսյանի մեղավորությունը, սակայն նրա նկատմամբ քրեական հետապնդում չի իրականացվել՝ համաներման հիմքով:

Իր վերաքննիչ բողոքում փաստաբանը պահանջում է նաև վերացնել Սուրիկ Խաչատրյանի նկատմամբ քրեական հետապնդում չիրականացնելու որոշումը, քանի որ, նախաքննական մարմնի պատճառաբանության համաձայն,  Սուրիկ Խաչատրյանը ծեծին չի մասնակցել: 

Ինչպես լրագրողների հետ զրույցում նշեց Հայկ Ալումյանը, իրենք  այդ դրվագով վիճարկում են   նախաքննական մարմնի  կողմից տրված իրավական գնահատականներն ու դեպքի բուն նկարագրությունը:

Պաշտպանական կողմը գտնում է, որ եթե անգամ  Զարզանդ Նիկողոսյանը  խփել է Ավետիք Բուդաղյանին, ինքը միակ խփողը չի եղել: Դրա մասին են վկայում այն  խոսակցությունները, որ Նիկողոսյանը  վարում էր Սուրիկ Խաչատրյանի առանձնատան խոհանոցում:

Մեկնաբանելով Զարզանդ Նիկողոսյանի արտահայտությունը՝  «հավայի տեղը Ավոյին խփին-մփին, ավտոյից հանին», Հայկ Ալումյանը նկատեց, որ մարդն իր մասին չի խոսի երրորդ դեմքով, այդպես արտահայտվում է ոչ թե այն մարդն, ով խփել է, այլ ով ականատես է եղել ծեծին: Իսկ ավտոմեքենայի մեջ, ըստ գործի տվյալների,  Ավետիքին  հնարավոր ծեծողների մեջ  բացի Զարզանդ Նկկողոսյանից եղել են  Սուրիկ Խաչատրյանը ու նրա  վարորդ  Արագած Ղևոնդյանը:

«Մենք վիճարկում ենք ոչ թե նրա համար, որ Զարզանդ Նիկողոսյանը մեղավոր չէ, այլ որ մեղավոր է ոչ միայն նա: Վիճարկում ենք նաև ծեծի՝  նախաքննական մարմնի  պատճառաբանությունը»: Ըստ նախաքննական մարմնի նկարագրության, Ավետիքը  սկսել է ինչ-որ հայհոյանքներ տալ, և նրան  սաստելու համար Զարզանդ Նիկողոսյանը հարվածել է: Մինչդեռ  խոհանոցի ձայնագրության մեջ պարզ երևում է, թե այդ վեճն իրականում   ինչպես  է առաջացել՝ ««Աչքերը բացեց,  ասաց,  էս ո՞վ է կողքս նստած, ասացինք՝  շեֆ, Ավոն ա, Ավոն ո՞վ է,  Ավոյի սենցը,  Ավոյի նենցը»: Դե հո չէ՞ր  վերարտադրի հայհոյանքները՝  կանանց էր պատմում, «Ավոյին մի քանի հատ տվինք, ավտոյից հանինք», իսկ  դրանից առաջ ասում է՝  «հավայի տեղը խփին-մփին, ավտոյից իջեցրին»,- ասաց Հայկ Ալումյանը՝ հավելելով, որ կա ծեծի առաջացման պատճառի այլ տվյալ՝  ավտոմեքենայի ծեծի  դեպքից հետո Ավետիք Բուդաղյանը հարազատներին պատմել էր,  որ  մարզպետը ինչ-որ տնտեսական բնույթի պահանջներ է ներկայացրել՝ ասելով՝  «դու ո՞վ ես, որ առանց մեզ հետ համաձայնեցնելու գործունեություն ես իրականացնում»: