Փաստ ինֆո

Տղամարդուն կացնով ու լինգով սպանած երիտասարդ կնոջը Լոռու մարզի ընդհանուր իրավասության դատարանը դատապարտեց 10 տարվա ազատազրկման:

2013թ. օգոստոսի 28-ի լույս 29-ի գիշերը Լոռու մարզի Ստեփանավան քաղաքում կատարված սահմռկեցուցիչ սպանությունը ժամանակին մեծ աղմուկի առիթ էր դարձել:

Ընկերուհու տանը ամիսներ շարունակ հյուընկալվող երիտասարդ կինն անկողնում կացնահարել էր ընկերուհու ամուսնուն, ապա նրա խորթ դստեր օգնությամբ թաքցրել դիակը:

Օրենքով նախատեսված պատժից խուսափելու համար կինը նաև սուտ պատմություն էր հորինել` իրավապահներին պատմելով, թե, իբր, սպանված տղամարդը ժամանակին սպանել էր իր կնոջը:

Օգոստոսի 28-ի լույս 29-ի գիշերը կատարված հանցագործության մասին իրավապահներին հայտնի էր դարձել միայն սեպտեմբերի 1-ին, երբ նրանք տան նկուղում հայտնաբերել էին սպանվածի դին: Նույն օրն սպանությունը կատարելու կասկածանքով ձերբակալվել էր Հեղինե Գալստյանը և տվել խոսոտովանական, բայց կեղծ ցուցմունք:
 
22- ամյա կինը մանրամասն պատմել էր, թե ինչպես է անկողնու մեջ պառկած ժամանակ դանակով և կացնով հարվածներ հասցրել 38-ամյա Ալեքսանդր Կլիմովի մարմնի տարբեր մասերին, քանի որ վերջինը ցանկացել է իր կամքին հակառակ սեռական հարաբերություն ունենալ իր հետ:

Հեղինե Գալստյանը պատմել էր, որ 2011թ. ամուսնացել և բնակություն էր հաստատել Ապարան քաղաքում: Բայց 2 տարի անց ամուսնալուծվել է, վերադարձել հայրական տուն, ծնողներն իրեն չեն ընդունել, ինքն էլ աշխատանք փնտրելու համար գնացել է Ստեփանավան քաղաք:

Այստեղ սրճարանում աշխատանքի անցնելով` ծանոթացել է նույն սրճարանում աշխատող Ս.Հովհաննիսյանի հետ և խնդրել է նրան թույլ տալ որոշ ժամանակ բնակվել իր տանը: Ս.Հովհաննիսյանը համաձայնել է, և ինքն սկսել է բնակվել նրա, նրա ամուսնու` Ալեքսանդր Կլիմովի, և անչափահաս դստեր հետ:

Որոշ ժամանակ անց Ս.Հովհաննիսյանը վիճաբանել է ամուսնու հետ և հեռացել տանից, իսկ ինքը շարունակել է բնակվել նույն տանը, որի ընթացքում ընկերուհու ամուսնու հետ երբեմն իր կամքով սեռական հարաբերություն է ունեցել:

Իսկ դեպքի օրը, կնոջ պատմածի համաձայն, Ալեքսանդր Կլիմովն ալկոհոլի ազդեցության տակ պահանջել է իր հետ ոչ բնական ճանապարհով սեռական հարաբերություն ունենալ: Ինքը մերժել է, և Կլիմովն սկսել է ծեծել իրեն, գցել անկողնու վրա, հանել շորերը, ինքն էլ, դանակը վերցնելով, անկողնու մեջ մի քանի հարված է հասցրել, ապա հարվածել է նաև կացնով և լինգով ու տեղում սպանել նրան:

Հետո արթնացրել է նույն սենյակում քնած 9-րդ դասարանցի աղջկան ու խնդրել օգնել իրեն, Ալեքսանդր Կլիմովի դիակը տանից տեղափոխել նկուղ և թաքցրել այնտեղ: Կինն ասել է, թե աղջկան չարթնացնելու համար տղամարդը ձեռքով փակել է իր բերանը, բայց ավելի ուշ անչափահաս աղջիկն ասել է,թե ամեն ինչ լսել ու տեսել է, բայց վախից թաքնվել է վերմակի տակ ու լաց եղել:

Իր արաքը  Հեղինե Գալստյանը  բացատրել է նրանով, որ շուրջ 2 ամիս առաջ Ալեքսանդր Կլիմովն իր ներկայությամբ դանակով սպանել է իր նախկին կնոջը՝ Ս.Հովհաննիսյանին, և ստիպել իրեն կնոջ դիակը երկուսով տեղափոխել ու թաղել Լոռու մարզի Գետավան գյուղի գերեզմանատանը:

Սակայն Ս.Հովհաննիսյանի դիակը որոնումներից հետո իրավապահները պարզել էին, որ կինը ստում է, իսկ մի քանի օր անց նաև հայտնաբերել էին նրան ող և առողջ` Դսեղ գյուղի հանդամասում աշխատելիս:

Քննիչի հրավերով Ստեփանավան վերադարձած կինը, իմանալով ամուսնու սպանության մասին, իրավապահներին պատմել էր, որ տնից հեռացել է ընդամենն այն պատճառով, որ կորցրել է ամուսնու գնած բջջային հեռախոսը և վախեցել է նրա զայրույթից, իսկ ամուսնու մահվան մասին իմացել է միայն քննիչի առանձնասենյակում:

Այսպիսով, իրավապահներին հաջողվել էր բացահայտել իրեն հյուրընկալած տան տիրոջը դաժանաբար սպանած Հեղինե Գալստյանի կատարած հանցագործությունը:

Իսկ դատարանը, նրան մեղավոր ճանաչելով ՀՀ քրեական օրենսգրքի 104-րդ հոդվածի 1-ին մասով նախատեսված արարքի համար, որոշում է կայացրել դատապարտել 10 տարվա ազատազրկման: