Փաստ ինֆո

Կառավարության այսօրվա նիստում հերթական ուշագրավ զրույցը տեղի ունեցավ Վարչապետ Հովիկ Աբրահամյանի և պետական գույքի կառավարման վարչության պետ Արման Սահակյանի միջև, երբ վերջինը ներկայացնում էր «Գրահրատարակչական գործունեություն իրականացնող իրավաբանական անձանց և անհատ ձեռնարկատերերին պետական սեփականություն հանդիսացող անշարժ գույքի անհատույց օգտագործման տրամադրման չափորոշիչները հաստատելու մասին» կառավարության անցյալ տարվա որոշման մեջ առաջարկվող փոփոխությունները:

Առաջարկվող փոփոխությունների համաձայն, Արման Սահակյանի խոսքով, նախատեսված են հետևյալ չափորոշիչները` գրապահոցներ, ձեռագրապահոցներ, գրադարաններ՝ բառարաններով ու անհրաժեշտ տեղեկատվական գրականությամբ, համակարգիչներ, պատճենահանող և այլ սարքավորումներ:

Հետևաբար և այդ նպատակով տրամադրվող տարածքն էլ պետք է համապատասխանի այս պահանջներին:

«Մեկ աշխատողի հաշվով` 6 - 8 քառ. մետր մակերեսով տարածք, 1 սենյակ տնօրենի համար` 50 քմ»,- ասաց Արման Սահակյանը:

Այս պահանջը, սակայն, Հովիկ Աբրահամյանին կասկածելի թվաց և նա բանախոսից հետաքրքրվեց, թե ի՞նչ է նշանակում միայն 50 քմ հատկացնել տնօրենին:

«50 քմ տնօրենի համար շատ մեծ է, 50 քմ-ն ի՞նչ անի տնօրենը»,- ասաց վարչապետն ու առաջարկեց կրճատել տարածքը պահանջվող չափը:

Լարված իրավիճակը մեղմեց կառավարության աշխատակազմի ղեկավար-նախարար Դավիթ Հարությունյանը: Նա տեղեկացրեց, որ թյուրըմբռնում է տեղի ունեցել, և իրականում 50քմ-ը ոչ թե միայն տնօրենի սենյակն է, այլև՝ աշխատակիցների:

«Դե ուրեմն գրեք աշխատակիցների սենյակ»,- ասաց Վարչապետն ու հանձնաարեց ուղղել նախագիծը: