Փաստ ինֆո

Սոցիալական ապահովության պետական ծառայության նախկին պետ Վազգեն Խաչիկյանի կարծիքով՝  մեղադրող դատախազը պետք է հրաժարվի  մեղադրանքից:

Ըստ Խաչիկյանի, մեղադրողն անզգուշաբար չի անդրադարձել այն հարցին, թե մեղադրանքի հիմքում դրված 29 մլն ՀՀ դրամը ում է պատկանել, ում է պատճառվել վնասը,  ով է տուժողը և թե ինչպես է որոշվել, որ այդ գումարները պետք է վճարվի պետական բյուջե:

Խաչիկյանի դիտարկմամբ՝  մեղադրանքի հիմքում նաեւ շարադրված չէ, թե ում վստահությունն է չարաշահել և ում խաբել:

Խաչիկյանի պաշտպան Ժորա Վարոսյանն էլ դատարանին միջնորդեց Խաչիկյանին առաջադրված ՀՀ քրեական օրենսգրքի 179-րդ հոդվածի 3-րդ մասի 1, 2-րդ կետով և 178-րդ հոդվածի 3-րդ մասի 1-ին կետով արդարացնել: Ինչ վերաբերում է 38-314-րդ հոդվածին, ապա պաշտպանը միջնորդեց այդ մասով քրեական գործի վարույթը կարճել՝ վաղեմության հիմքով:

Ժորա Վարոսյանը նշեց, որ իր պաշտպանյալն առաջադրված մեղադրանքում իրեն մեղավոր չի ճանաչել, առաջադրված մեղադրանքը հիմնված է բացառապես մյուս ամբաստանյալների ցուցմունքների  վրա, իսկ վերջիններս գործով հանդիսանում են շահագրգիռ անձինք: Վկաների ցուցմունքներն էլ,  ըստ պաշտպանի, չեն կարող դրվել մեղադրանքի հիմքում, քանի որ դրանք հիմնված են միայն ենթադրությունների վրա:

Պաշտպանը գտնում է, որ Խաչիկյանը յուրացում և խարդախություն չի կատարել, նախաքննության մարմինը արարքը որակել է կազմակերպված խմբի կողմից կատարված, սակայն  Խաչիկյանի կողմից յուրացում կատարվելու նպատակով որևէ խումբ չի կազմակերպվել:

Ըստ մեղադրանքի՝ Վազգեն Խաչիկյանը 2005թ. հունվարի 14-ից մինչև 2010թ. դեկտեմբերի 17– ն աշխատել է ՀՀ աշխատանքի և սոցիալական հարցերի նախարարության սոցիալական ապահովության պետական ծառայության պետի պաշտոնում: Հանդիսանալով մշտապես կազմակերպչական-տնօրինչական և վարչատնտեսական գործառույթներ իրականացնող պաշտոնատար անձ և օգտվելով ծառայությունը կառավարելու իր լիազորություններից, մասնավորապես՝ իր կողմից վերահսկվել է կենսաթոշակառուների կողմից կասեցված կենսաթոշակի վճարումը վերսկսելու վերաբերյալ կենսաթոշակային ապահովության և առանձին ծրագրերի վարչությանը ներկայացված դիմումների հիման վրա կուտակված կենսաթոշակների գումարները Ծառայության վճարային ծառայության Երևան քաղաքի ստորաբաժանումների կողմից վճարելու գործընթացը:

Նա, Ծառայության մի շարք պաշտոնատար և պատասխանատու անձանց հետ, կազմակերպված խմբով, 2006–2010թթ. ընկած ժամանակահատվածում, օգտագործելով իրենց պաշտոնեական դիրքը, պաշտոնեական կեղծիք կատարելու, այն է՝ կենսաթոշակի կասեցված վճարումը վերսկսելու վերաբերյալ վճարման իրավունք վերապահող կեղծ դիմումներ պատրաստելով կամ առանց այդ դիմումների, վճարային ցուցակներում կենսաթոշակառուների ստորագրությունները կեղծելու միջոցով անհիմն ելքագրել և յուրացման եղանակով հափշտակել են իրենց վստահությանը հանձնված, մահացած կամ ՀՀ տարածքից բացակայող կենսաթոշակառուների վճարումը կասեցված կենսաթոշակի առանձնապես խոշոր չափերի, ընդհանուր՝ 260.956.681 ՀՀ դրամ գումարները:

Բացի այդ` Վազգեն Խաչիկյանը խարդախությամբ հափշտակել է պետական բյուջե վերականգնման ենթակա, առանձնապես խոշոր չափերի` 29.000.000 ՀՀ դրամ գումարը: