Փաստ ինֆո

Ազգային ժողովի Տնտեսայան հարցերի մշտական հանձնաժողովն այսօրվա նիստում դրական եզրակացություն է տվել 2014 թվականի հոկտեմբերի 10-ին Մինսկում ստորագրված «Հայաստանի Հանրապետության` «Եվրասիական տնտեսական միության մասին» 2014 թվականի մայիսի 29-ի պայմանագրին միանալու մասին» պայմանագիրը նստաշրջանի օրակարգում ընդգրկելուն:

Նիստի մասնակիցներից, ինչպես ակնկալվում էր, դեմ են քվեարկել միայն «Ժառանգություն» խմբակցության քարտուղար Թևան Պողոսյանը և անկախ պատգամավոր, «Ազատ դեմոկրատներ» կուսակցության հիմնադիր նախագահ Խաչատուր Քոքոբելյանը:

«Փաստինֆո»-ն ավելի վաղ տեղեկացրել էր, որ ԱԺ-ում ներկայացված քաղաքական ուժերից այս պայմանագրին հրապարակայնորեն դեմ են արտահայտվել միայն «Ժառանգություն»-ը և «Ազատ դեմոկրատներ»-ը:
 
«Հայաստանի Հանրապետության Եվրասիական տնտեսական միության մասին 2014 թվականի մայիսի 29-ի պայմանագրին միանալու վերաբերյալ» թեմայով նոյեմբերի 24-ին կազմակերպված խորհրդարանական լսումների ժամանակ Խաչատուր Քոքոբելյանը, մասնավորապես, հայտարարեց, որ այս պայմանագիրը համարում է ոչ թե զարգացման հնարավորություն, ինչպես պնդում են կողմնակիցները, այլ` «մեծ մարտահրավեր` ՀՀ-ի և ՀՀ-ի տնտեսության համար, որը մեզ զրկելու է նոր միջոցների, օտաերկրյա ուղղակի ներդրողների հնարավորությունից»:

Նրա համոզմամբ՝ անհավանական է, որ որևէ «վերազգային լուրջ կազմակերպություն ցանկություն հայտնի ներդրում անել մի միջավայրում, որի ապագան ոչ թե մշուշոտ է, այլ` խիստ կանխորոշված դեպի վատը»:

Նաև ընդգծեց, որ «մենք ոչ ադեկվատ քայլ ենք անում այսօրվա զարգացող աշխարհում»: Իսկ ելույթն էլ ավարտեց հույսով, որ «կգա ժամանակը, որ հնարավորություն կունենանք մաս չկազմելու այդ կառույցի»:

«Ժառանգություն» խմբակցության անդամ Զարուհի Փոստանջյանն էլ հայտարարեց, որ այս գործընթացն ապազգային է, և կոչ արեց պատգամավորներին ԱԺ լիագումար նիստում պայմանագրի քննարկման ժամանակ դեմ քվեարկել: Ապա պատգամավորը հայտարարեց, որ ովքեր դեմ չեն քվեարկի, կհամարվեն պետական դավաճաններ: