Փաստ ինֆո

«Դոլարի 410 դրամ փոխարժեքն, իրոք, չէր արտացոլում իրական հավասարակշիռ վիճակը»,- «Փաստինֆո»-ի խնդրանքով անդրադառնալով դրամի՝ վերջին օրերին արձանագրված արժեզրկմանը՝ ասաց տնտեսական մեկնաբան Բաբկեն Թունյանը՝ միաժամանակ  հավելելով. «Այլ հարց է՝ որքանո՞վ էր ճիշտ 2-3 շաբաթ շարունակ զսպել փոխարժեքն ու հանկարծ թույլ տալ, որ այն մեկ օրում արժեզրկվի 4%-ով։ Բացի այդ, դեռևս հարց է՝ արդյոք նոր փոխարժեքը արտացոլո՞ւմ է իրական հավասարակշիռ վիճակը, թե՞ դեռ ճշգրտվելու տեղ կա»:

Համաձայնելով տեղի ունեցածի շուրջ ԿԲ-ի նշած պատճառների հետ՝ տրանսֆերտների նվազում, ներդրումների դանդաղում, արտահանման աճի տեմպի դանդաղում և այլն, Բաբկեն Թունյանը նշեց նաև, որ բացասական դեր են ունեցել նաև սպասումներն ու «որոշ ֆինանսական կառույցների սպեկուլյատիվ գործելաոճը, որոնք հրաժարվում էին դոլար վաճառել՝ ստեղծելով դեֆիցիտ»։

«Այս ամենի արդյունքում բնական է, որ դրամը պետք է արժեզրկվեր»,- ասաց մեր զրուցակիցը։

Պատասխանելով դրամի արժեզրկման՝ հայաստանյան տնտեսության վրա հնարավոր բացասական հետևանքների մասին մեր հարցին՝ Բաբկեն Թունյանը նշեց, որ այս պահին վտանգ չկա, միակ վտանգը, ըստ նրա, հնարավոր խուճապն է:

«Այսինքն՝ եթե մեր հայրենակիցներն ու ֆինանսական կառույցները, սպասելով դոլարի հետագա թանկացման, խուսափեն դոլար վաճառելուց ու փորձեն արտարժույթ կուտակել, դա արդեն անկանխատեսելի հետևանք կունենա. սպասումները կարող են ավելի ու ավելի արժեզրկել դրամը»,- ասաց մեր զրուցակիցը՝ այդուհանդերձ հույս հայտնելով, որ նման բան տեղի չի ունենա։

«Կանխատեսումներ անելն անշնորհակալ գործ է, ամեն դեպքում կարծում եմ, որ եթե հաղթահարվի շուկայական այս լարվածությունն ու անորոշությունը, դրամը մինչև տարեվերջ կարող է մի քանի կետով արժևորվել»,- ասաց նա:

 «ԿԲ-ն իր հայտարարության մեջ նշել էր, որ փոխարժեքի ճշգրտումը կնպաստի տնտեսական աճին, արտահանմանը, նոր աշխատատեղերի ստեղծմանը և այլն։ Սա հնարավոր է, սակայն՝ ոչ միանգամից, այլ՝ երկարաժամկետ հեռանկարում։ Բյուջեի վրա բացասական ազդեցություն դժվար թե ունենա։ Հակառակը՝ կավելանան ներմուծումից բյուջե մտնող հարկերն ու տուրքերը։ Իսկ բացասական հետևանքը երևալու է շատ արագ։ ԿԲ-ն նշում է, որ դրամի արժեզրկումը նպաստում է բնակչության կողմից ստացվող տրանսֆերտների գնողունակության աճին»,- լավատեսական կանխատեսում արեց Բաբկեն Թունյանը՝ չթաքցնելով նաև բացասական սպասումները:

«Ներմուծվող ապրանքների գներն են թանկանալու, ինչն ազդելու է բոլոր շերտերի վրա։ Նաև մեծապես տուժում են դոլարային վարկեր ունեցող մեր համաքաղաքացիները, որոնց պարտքային բեռն էլ ավելի է ծանրանալու»,- մեր հարցերին ի պատասխան ասաց տնտեսական մեկնաբան Բաբկեն  Թունյանը: