Փաստ ինֆո

Սյունիքի մարզպետարանն այսօր արձագանքել է «Փաստինֆո»-ի հրապարակմանը, որում մեր խնդրանքով փաստաբան Հայկ Ալումյանը մեկնաբանել էր «yerkir.am» կայքին տված հարցազրույցում Սուրիկ Խաչատրյանի տված որոշ պատասխանները:

Ներկայացնում ենք Սյունիքի մարզպետարանի պարզաբանումն ամբողջությամբ.

«Հայկ Ալումյանը, անդրադառնալով մարզպետի պաշտոնամուտի արարողության տեսաձայնագրությանը, հայտնել  է տեսակետ այն մասին, թե իբր ՀՀ Սյունիքի մարզպետ Սուրիկ Խաչատրյանը շնորհակալություն է հայտնել «իր չորս հենասյուներին, այդ թվում՝ դատարանի նախագահին՝ իր անձնակազմով…»: Նման մեկնաբանությունը պարզ ու նպատակաուղղված ապատեղեկատվություն է, որի նպատակն է ձևավորել մասնագիտական գործունեությանը ծառայող հասարակական  կարծիք: Իրականում 2014 թվականի սեպտեմբերի 26-ին Սյունիքի մարզպետարանում աշխատակազմի հետ հանդիպման ժամանակ Սուրիկ Խաչատրյանն ասել է.

«… Ես հաջողություն եմ ցանկանում և ես շնորհակալ եմ ձեզանից բոլորից, շնորհակալ եմ մեր մարզի  այդ կարևոր  4 սյուներից՝ մեր կայազորի հրամանատարն է, Ազգային անվտանգության ծառայության պետն է, դատախազն է, դատարանի նախագահն է, ոստիկանապետն է՝  իրենց ամբողջ համակարգով, որ կարողացել եք այս տարիների ընթացքում համագործակցել միասնական՝ ի շահ Սյունիքի, ի շահ մեր պետության… Համոզված եմ, որ սրանից հետո ավելի բարձր տեմպերով և ավելի միասնական ուժերով մեր խնդիրները կլուծենք… »:

Ասվածը վերաբերում է Սյունիքի մարզին, ինչպես նաև մեր պետությանը, այլ ոչ թե Սուրիկ Խաչատրյան անձին: Եվ այս դեպքում բառախաղի հնարանքի միջոցով փաստերի խեղաթյուրված բացատրությունները պատիվ չեն բերում հեղինակավոր փաստաբանին»:

«Փաստինֆո»-ն խնդրեց այս պարզաբանումը մեկնաբանել  փաստաբան Հայկ Ալումյանին: 

Փաստաբանի մեկնաբանությունն ևս ներկայացնում ենք առանց կրճատումների.

«Նախ, ես ոչ մի հակասություն չտեսա իմ մեջբերման և բնագրի միջև: Կարծում եմ` ընթերցողը նույնպես: Հետաքրքիր է մեկ այլ բան. իմ տեղեկությամբ /խնդրում եմ ինձ ուղղել, եթե սխալվել եմ/ այս «հերքումը» ուղարկվել է Սյունիքի մարզպետարանից: Նման պարագաներում անհասկանալի է, թե ինչո՞ւ է մարզպետարանը միջամտում փաստաբանի և Սուրիկ Խաչատրյանի հեռակա բանավեճին: Օրենքի ո՞ր դրույթն է մարզպետարանին նման լիազորություն տվել:  Միգուցե` այս «հերքման» նախաձեռնողը հենց ինքը Սուրիկ Խաչատրյանն է, իսկ մարզպետարանի անունից այն տարածելը նպատակ է հետապնդում ավելի ծանրակշիռ դարձնելու «հերքումը», տպավորություն ստեղծելով, թե այն արվում է մի ամբողջ մարզի ժողովրդի անունից»: