Փաստ ինֆո

2016 թվականից սկսած Հայաստանը ԵՏՄ-ին անդամավճար է վճարելու` այդ կառույցի հաստատված բյուջեի 1.13-րդ մասը: Այս մասին այսօր Աժ-ում «Հայաստանի Հանրապետության Եվրասիական տնտեսական միության մասին 2014 թվականի մայիսի 29-ի պայմանագրին միանալու վերաբերյալ» թեմայով լսումների ժամանակ հայտարարեց ՀՀ ֆինանսների նախարարի տեղակալ Սուրեն Կարայանը:

«Այսինքն` անդամակցության հաջորդ ամսվանից սկսած Հայաստանը կսկսի անդամավճար վճարել»,- ասաց փոխնախարարը, չհստակեցնելով, սակայն, թե  որքան է կազմելու Հայաստանին բաժին ընկնող անդամավճարի չափը:

Հիշեցնենք՝ շուրջ 1 ամիս առաջ ՌԴ տնտեսական զարգացման փոխնախարար Ալեքսեյ Լիխաչովը հայտարարել էր, որ ԵՏՄ անդամ երկրների բաժնեմասային անդամավճարների բանաձևը համապատասխանում է ներկրման մաքսատուրքերի բաշխման բանաձևին. դրա 88 տոկոսը բաժին է ընկնում ՌԴ-ին, 4.7 տոկոսը՝ Բելառուսին, 7.3 տոկոսը՝ Ղազախստանին:

2016 թվականից` Հայաստանի կողմից անդամավճար վճարելու պահից սկսած, ռուսաստանցի պաշտոնյայի խոսքով, անդամավճարների վերաբաշխում կկատարվի, իսկ 2015-ին՝ ԵՏՄ-ին միանալու պարագայում Հայաստանն առայժմ անդամավճար չի վճարի:

Սուրեն Կարայանն այսօր ներկայացրեց նաև ԵՏՄ-ին ՀՀ անդամակցության հակիրճ ընթացքը` նշելով, որ բոլոր քայլերը, մինչև ԵՏՄ անդամակցության պայմանագրի ստորագրությունը, իրականացվել են՝ նախապես որոշված ճանապարհային քարտեզին համապատասխան:

«ԵՏՄ-ի հիմնական նպատակներն են անդամ պետությունների տնտեսական զարգացումը, մրցունակության բարձրացումը, տնտեսության համակողմանի արդիականացումը»,- իր ելույթում նշեց փոխնախարարը` հավելելով, որ ԵՏՄ անդամակցության պայմանգիրը կազմված է բուն պայմանագրից և 33 հավելվածներից:

Խորհրդարանական լսումները վարող ԱԺ ՀՀԿ պատգամավոր Վարդան Այվազյանն էլ հիշեցրեց, որ կառավարությունը 22 աշխատանքային խումբ է ստեղծել, որոնք իրականացնում են ճանապարհային քարտեզով նախանշված 212 միջոցառումները: