Փաստ ինֆո

Զենք-զինամթերք ապօրինի ձեռք բերելու, պահելու, ինչպես նաև խուլիգանության գործով դատարանը մերժեց դատախազին բացարկ հայտնելու պաշտպանական կողմի միջնորդությունը:

Ըստ ամբաստանյալ Ռաֆայել  Գևորգյանի պաշտպան Կարեն Հակոբյանի` գործի քննությունը միակողմանի է տարվել, իսկ դատախազը կանխակալ վերաբերմունք  ունի իր պաշտպանյալի նկատմամբ և «ամեն գնով» ցանկացել է նրան պահել կալանքի տակ:

Նոյեմբերի 21-ի դատական նիստում 30-ամյա բարձրագույն կրթությամբ ամբաստանյալը, մինչ կմիանար պաշտպանի միջնորդությանը, նախ հրաժարվեց վերջինիցս, հետո հայտարարեց, թե լավ չընկալեց միջնորդությունը, բայց հասկացավ,  որ իր շահերից է բխում ու համաձայնեց, որ պաշտպանը ներկայացնի միջնորդությունն ու շարունակի իրականացնել իր շահերի պաշտպանությունը:

Ի դեպ, նշենք, որ պաշտպան Հակոբյանը զարմանքով արձագանքեց պաշտպանյալի հայտարարությանը` նշելով, որ դա իր համար անակնկալ էր:

Հաջորդ անակնկալը  բոլոր կողմերին զարմացրեց.  ամբաստանյալը հայտարարեց, որ նիստը նախագահող դատավորի հետ կցանկանա որոշակի հարցերի շուրջ քննարկում ունենալ և որ ունի գրավոր  միջնորդություն, սակայն ցանկանում է, որ այն միայն դատավորը ընթերցի, իսկ  մեղադրողն ու տուժողի ներկայացուցիչը չլսեն: Դատարանն ամբաստանյալին պարզաբանեց, որ որեւէ կողմի ներկայացրած ցանկացած միջնորդության մասին մյուս կողմը պետք է տեղեկանա:

Հարգելով դատավարական ընթացակարգը`  ամբաստանյալը գնաց «զիջումների»  և, ներկայացնելով միջնորդության բովանդակային իմաստը,  այն հանձնեց դատարանին:

20 թերթից բաղկացած տետրում ամբաստանյալը միջնորդել էր իր նկատմամբ խափանման միջոց ընտրված կալանավորումը փոխարինել գրավով, իսկ որպես գրավի չափ ամբաստանյալը նշել էր  2 մլն դրամը: Հաջորդ միջնորդությունը կրկին վերաբերում էր պաշտպանից հրաժարվելուն:

Ամբաստանյալի ներկայացրած միջնորդությունների պատճեները դատարանը կտրամադրի կողմերին և դրանց կանդրադառնա հաջորդ նիստում: 

Պաշտպան Կարեն Հակոբյանը ևս ցանկություն հայտնեց միջնորդություն ներկայացնել` իր պաշտպանյալի խափանման միջոցը փոխելու հետ կապված, և կողմերին  տրամադրեց միջնորդության պատճենները,  աշխատանքային օրվա ավարտով պայմանավորված պաշտպանը միջնորդությունը կներկայացնի հաջորդ՝  դեկտեմբերի 2-ին կայանալիք նիստում:

Նշենք նաև, որ դատական նիստին չէր ներկայացել անչափահաս տուժողի ներկայացուցիչը՝ հայրը, վերջինիս կինը դատարանին հայտնեց, որ ամուսինը գտնվում է Վրաստանում՝ այնտեղ է աշխատում,  Հայաստան վերադառնում է ոչ հաճախ, իսկ որդին  առողջական խնդիրներ ունի, չի խոսում:

Մեղադրող դատախազի միջնորդությամբ դատարանը կդիմի սահմանային ծառայություններին՝ պարզելու համար, թե երբ է տուժողի իրավահաջորդը Հայաստանի սահմաններից  դուրս եկել, որպեսզի որոշվի տուժողի նոր  իրավահաջորդ ճանաչելու հարցը:

 Ըստ մեղադրանքի՝ Ռաֆայել Գևորգյանը գործով չպարզված ժամանակահատվածում և անձից ապօրինի կերպով ձեռք է բերել և իր կողմից վարձակալած բնակարանում ապօրինի պահել արհեստագործական եղանակով պատրաստված, 5.6 մմ տրամաչափի օղակավոր բոցավառման որսորդական-սպորտային հրացանային փամփուշտներ, ակոսավոր հրազեն հանդիսացող ատրճանակ և ռազմամթերք 29 փամփուշտներ:

Այնուհետև 2014թ. հուլիսի 7-ին, ժամը 32.30-ի սահմաններում, նշված շենքի բակի զրուցարանում թղթախաղով զբաղվող Էդգար Մարտիրոսյանի, Արմեն Աբրոյանի, Արման Եփրեմյանի և Արմեն Գևորգյանի հետ վիճաբանության մեջ է մտել, որի ընթացքում բացահայտ անհարգալից վերաբերմունք դրսևորելով վերջիններիս, ինչպես նաև շենքի բնակիչների նկատմամբ իր բնակարանի պատուհանից զենքի գործադրմամբ կրակել, շուրջ 20 րոպե դիտավորությամբ կոպիտ կերպով խախտել շենքի բնակիչների հանգիստը և հասարակական կարգը, որի ընթացքում Գրիգոր Աբրոյանին դիտավորությամբ պատճառել է առողջության թեթև վնաս՝ առողջության կարճատև քայքայումով:

Ռաֆայել Գևորգյանին մեղադրանք է առաջադրվել ՀՀ քրեական օրենսգրքի 258-րդ հոդվածի 4-րդ մասով  և 235-րդ հոդվածի 1-ին մասով, նրա նկատմամբ որպես խափանման միջոց է ընտրվել կալանավորումը: