Փաստ ինֆո

30-ամյա Գոռ Գևորգյանը, ով 2010 թվականի դեկտեմբերից մինչև 2014 թվականի հունիսի 6-ն ընկած ժամանակահատվածում զբաղեցրել է ՀՀ ոստիկանության քննչական գլխավոր վարչության Արմավիրի քննչական բաժնի ավագ քննիչի պաշտոնը, հայտնվել է մեղադրյալի կարգավիճակում:

Նախկին ոստիկանը մեղադրվում է պաշտոնեական լիազորությունները չարաշահելու մեջ: 

Գործն արդեն դատարանում է:

Այսպես, ըստ մեղադրական եզրակացության՝ ոստիկանության ավագ լեյտենանտը, անձնական այլ շահագրգռվածությունից ելնելով, պաշտոնական դիրքն օգտագործել է ծառայության շահերին հակառակ, որի հետևանքով էական վնաս է պատճառվել պետության օրինական շահերին, հեղինակազրկվել է պետական իշխանության մարմինը` ՀՀ ոստիկանությունը:

Ըստ գործի նյութերի՝ ավագ քննիչն իր վարույթում քննվող` 2014թ. ապրիլի 24-ին Սամվել Հարությունյանի կողմից զենքի գործադրմամբ խուլիգանություն կատարելու դեպքի առթիվ հարուցված քրեական գործով, Սամվել Հարությունյանի հետ ունեցած մտերիմ հարաբերությունները պահպանելու անձնական շահագրգռվածությունից ելնելով, կատարված հանցագործությունը լիարժեք բացահայտելու, վերջինիս հետախուզում հայտարարելուց հետո վարույթն իրականացնող մարմին ներկայացնելու ուղղությամբ իր պաշտոնեական պարտականությունները չի կատարել:

Մասնավորապես, քրեական գործի նախաքննության հենց առաջին օրերից բազմաթիվ անգամներ գաղտնի հանդիպումներ է ունեցել խուլիգանություն կատարելու մեջ մեղադրվողի և նրա ընկերոջ հետ, որի ընթացքում Սամվել Հարությունյանը խոստովանել է խուլիգանությունն իր կողմից կատարելու, «ՏՈԶ» տեսակի ատրճանակով կրակելու հանգամանքը, մանրամասն պատմել հանցագործության կատարման դրդապատճառների ու հանցագործության մասնակիցների գործողությունների մասին:

Սակայն ավագ քննիչը, դեպքի հանգամանքները պարզելու նպատակով անհետաձգելի քննչական գործողություններ կատարելու, նոր ապացույցներ հավաքելու, Սամվել Հարությունյանին վարույթն իրականացնող մարմին հրավիրելու և հատկապես հանցագործության գործիք հանդիսացող «ՏՈԶ» տեսակի ատրճանակը հայտնաբերելու ուղղությամբ ոստիկանության Արմավիրի բաժնի աշխատակիցների միջոցով օպերատիվ-հետախուզական աշխատանքները կազմակերպելու փոխարեն, Սամվել Հարությունյանին մանրամասն տեղեկացրել է նախաքննության նկատմամբ դատավարական հսկողություն իրականացնող դատախազի տված ցուցումների, ձեռք բերված ապացույցների մասին:

Ավելին, ըստ նախաքննական մարմնի՝ չբացահայտվելու նպատակով հորդորել է մեղադրյալին օգտագործել գաղտնի հեռախոսահամար և իր հետ կապ պահպանել այդ հեռախոսահամարով: Այդ ընթացքում Սամվել Հարությունյանի և մյուսների գտնվելու վայրը պարզելու ուղղությամբ աշխատանքներ կատարելու պատրանք ստեղծելու նպատակով 2014թ. մայիսի 5-ին ձևական բնույթ կրող ծանուցագրեր, ապա` բերման ենթարկելու մասին որոշումներ է ուղարկել ոստիկանության Արմավիրի բաժնին:

Ավագ քննիչը 2014թ. մայիսի 22-ին ՀՀ քրեական օրենսգրքի 258-րդ հոդվածի 4-րդ մասով Սամվել Հարությունյանին որպես մեղադրյալ ներգրավելու, նրա նկատմամբ հետախուզում հայտարարելու և կալանավորումը որպես խափանման միջոց ընտրելու միջնորդություն հարուցելու մասին որոշումներ կայացնելուց հետո` նույն օրը և հաջորդ օրը, կրկին գաղտնի հանդիպումներ է ունեցել արդեն հետախուզման մեջ գտնվող Սամվել Հարությունյանի հետ և տեղեկացրել իր կայացրած հիշյալ որոշումների մասին:

Գոռ Գևորգյանի՝ վերը շարադրված դիտավորյալ գործողությունների արդյունքում, ըստ մեղադրական եզրակացության, ծանր հանցագործություն կատարելու համար մեղադրվող Սամվել Հարությունյանը դիմել է փախուստի, իսկ նրա օգտագործած, հանցագործության գործիք հանդիսացող «ՏՈԶ» տեսակի ատրճանակը չի հայտնաբերվել, որով էականորեն խոչընդոտվել է արդարադատության մարմինների նորմալ գործունեությունը:

Գոռ Գևորգյանին մեղադրանք է առաջադրվել ՀՀ քրեական օրենսգրքի 308-րդ հոդվածի 1-ին մասով՝ Պաշտոնեական լիազորությունները չարաշահելը, խափանման միջոց ընտրվել՝ չհեռանալու մասին ստորագրությունը: