Փաստ ինֆո

Տուժող կողմը շարունակում է պնդել, որ «Վարդան Պետրոսյանը ավտոմեքենան վարել է ալկոհոլ օգտագործած վիճակում»,- այսօր դատարանում հայտարարեց Վարդան Պետրոսյանի գործով տուժող կողմի ներկայացուցիչ Ռուբեն Բալոյանը:

Նա հիշեցրեց, որ գործին կցված Վարդան Պետրոսյանի սթափության վիճակի զննության արաձանագրության մեջ առկա են բազմաթիվ ուղղումներ, ջնջումներ, լրացուցիչ գրառումներ, որոնք իր համոզմամբ, խոսում են այն մասին, որ դրանք «կատարվել են վարորդի խմածությունը քողարկելու նպատակով»: Ուստի՝ Ռուբեն Բալոյանը գտնում է, որ կատարված ուղղումների նպատակը և կատարողներին անհրաժեշտ է պարզել հենց գործի շրջանակներում:

Ռուբեն Բալոյանը դատարանին միջնորդեց նշանակել դատափաստաթղթաբանական և դատաձեռագրաբանական փորձաքննություններ՝ համեմատելու համար գործին կցված և Վարդան Պետրոսյանի փաստաբանի ներկայացրած արձանագրությունները:

Մեղադրող դատախազ Արթուր Սարգսյանը, սակայն, այնքան էլ չհամաձայնեց տուժողների ներկայացուցչի այս միջնորդության հետ, ասելով. «Ընդունենք՝ պարզվեց, որ Պետրոսյանը ինչ-որ մի աստիճանի խմած է, դա ի՞նչ է տալու: Ունենալու ենք չփարատված կասկած, հանցագործություններ կատարած անձինք, որ այդ գործի հետ կապ չունեն»:

Տուժող կողմի ներկայացրած միջնորդության և իր խմած կամ սթափ լինելու հարցի շուրջ դատարանում ծավալված քննարկումների վերաբերյալ կարծիք հայտնեց նաև ամբաստանյալ  Վարդան Պետրոսյանը:

«Ես նստած եմ լուռ, անխոնջ, ես կսպասեմ, որ աշխատեք բոլորդ ու տաք օբյեկտիվ գնահատական, այսինքն՝ դատավորին հնարավորություն տանք, որ տա օբյեկտիվ գնահատական, ես ձայն չեմ հանում, ինձ համար հաճելի չէ այն մարտավարությունը, որով ձգձգում են դատական նիստը: Ես առաջինը պետք է ընդվզեմ դրա դեմ, բայց ես չեմ խոսում»,- ասաց Վարդան Պետրոսյանը՝ միջնորդությունը բավարարելու կամ մերժելու հարցը թողնելով դատարանի հայեցողությանը:

Դատավոր Վաղինակ Մկրտչյանը, հայտարարված կարճատև ընդմիջումից հետո հրապարակելով դատարանի որոշումը, մերժեց տուժող կողմի ներկայացրած միջնորդությունը: