Փաստ ինֆո

Վարդան Պետրոսյանի վթարի գործով տուժող կողմը բացարկ հայտնեց մեղադրող դատախազ Արթուր Սարգսյանին՝ վերջինին մեղադրելով անկողմնակալության մեջ:

Վարդան Պետրոսյանի փաստաբան Նիկոլայ Բաղդասարյանը, սակայն, կարծում է, որ այս միջնորդությունը կողմերը նախապես համաձայնեցրել են:

«Ես միանշանակ համոզված եմ, որ այս ամենը նախապես համաձայնեցված է՝ ցույց տալու համար, որ տեսեք, դատարանին բացարկ ենք հայտնում: Չէր կարող Բալոյանը նախօրոք իմանար, որ դատախազը առարկություններ է ներկայացրել, մի հատ տեքստ գրեր: Չեմ հավատում»,- ասաց Նիկոլայ Բաղդասարյանը՝ հավելելով, որ դա նախօրոք մշակված սցենար է. դատարանը կմերժի նաև այս միջնորդությունը, Ռուբեն Բալոյանն էլ կհայտարարի, թե՝ «տեսեք ինչ անարդար դատարան է, մենք էլ ենք դժգոհ դատարանից»:
«Ու կլինեն մարդիկ, որ կհավատան»,- հայտարարեց պաշտպանը:  

Վարդան Պետրոսյանի մյուս փաստաբան Սամվել Ջաղինյանն էլ նշեց, որ եթե նույնիսկ համաձայնեցված չէր, Ռուբեն Բալոյանն այնքան անհիմն միջնորդություն է ներկայացրել, որ նախապես իմացել է, որ դատախազն առարկելու է դրա դեմ:

Ինքը՝ դատախազ Արթուր Սարգսյանը, սակայն, նշեց, որ որևէ պայմանավորվածություն չկա և չէր էլ կարող լինել, և եթե պաշտպաններն ավելի ուշադիր լինեին, ինքը նախկինում արդեն մեկ անգամ առարկել էր Ռուբեն Բալոյանի՝ Վարդան Պետրոսյանի խմածությանը վերաբերող մեկ այլ միջնորդության դեմ, ուստի դժվար չէր ենթադրել, որ այս անգամ էլ կառարկի:

«Ինձ զարմացնում է այն, որ ամբողջ դատական պրոցեսի ընթացքում պարոն Բալոյանն ավելի շատ որպես մեղադրող էր հանդես գալիս, կարելի է ասել՝ «մեղադրող-2»,- ասաց Վարդան Պետրոսյանն ու հավելեց, որ փոխարենը հանձին դատախազի ինքը մշտապես տեսել է լուրջ պրոֆեսիոնալի:

Ուստիև՝ դատախազի բացարկի հարցը թողնում է դատարանի հայեցողությանը:

Այսպիսով, դատական նիստը հերթական անգամ ընդմիջվեց, և դատարանը դարձյալ անցավ խորհրդակցական սենյակ՝ որոշում կայացնելու:

Ավելի ուշ դատարանը մերժեց մեղադրող դատախազ Արթուր Սարգսյանին բացարկ հայտնելու վերաբերյալ տուժողների ներկայացուցիչ Ռուբեն Բալոյանի միջնորդությունը:

Դատական հաջորդ նիստը նշանակվեց նոյեմբերի 26-ին՝ ժամը 14:30-ին: