Փաստ ինֆո

Մորը ծեծի ենթարկելու գործով դատարանը կդիմի հանրային պաշտպանի գրասենյակ՝ ինչպես տուժող տարեց կնոջը, այնպես էլ նրա ամբաստանյալ որդուն իրավական օգնություն ցուցաբերելու նպատակով պաշտպան տրամադրելու խնդրանքով:

Հիշեցնենք, որ գործով նախագահող դատավոր Արմեն Վարդապետյանը ինքնաբացարկ էր հայտնել՝ տուժողի և նրա ամբաստանյալ որդու հետ իրենց ազգակցական կապից ելնելով, և գործը մակագրվել է նույն դատարանի մեկ այլ դատավորի՝ Դավիթ Հարությունյանին:

Նախագահող դատավորի որոշմամբ՝ հանրային պաշտպան կտրամադրվի տուժողին այն պատճառով, որ վերջինս լսողական և տեսողական խնդիրներ ունի, քանի որ այդ պայմաններում նա չի կարող իրականացնել իր պաշտպանությունը: Ինչ վերաբերում է ամբաստանյալին, ապա վերջինս ունի հոգեկան առողջության հետ կապված խնդիրներ և ներկայումս գտնվում է հոգեբուժական հիվանդանոցում:

Աբաստանյալին ուղեկցող բուժքույրը, ով իր հետ չուներ տվյալ բուժհաստատությունում աշխատելու մասին հավաստող ոչ մի փաստաթուղթ, նշեց, որ իրենք ամեն անգամ չեն կարող 150 կմ բերել և տանել ամբաստանյալ Աբրահամին, քանի որ վերջինս ստացիոնար բուժման մեջ է գտնվում, ստանում է դեղորայք, իսկ այսօրվա նիստին նրան ներկայացնելու համար ներարկում են կատարել, հետո բերել դատարան: Բուժքույրը մտահոգված էր նաև, որ ամբաստանյալի դեղահաբն ընդունելու ժամանակն անցնում է:

Դատարանը դիմելով կնոջն, բացատրեց դատավարական համապատասխան կարգը, որ  այդ մասին պետք է բուժհաստատության տնօրենը գրություն ուղարկի դատարանին, որից հետո միայն այդ հարցը կքննարկվի:

Ամբաստանյալը, ով հստակ չէր հիշում իր դատավածությունների քանակը, նշեց, որ ամուսնացած է զավակներ չունի և որ կնոջ հետ հաշտ չեն, «գզում ենք  իրար», և որ ներկայումս «բուժվում է, որ խելոքանա»:

Ըստ մեղադրանքի՝ նախկինում 6 անգամ դատապարտված Աբրահամը մոր հետ բնակվելով վերջինիս պատկանող բնակարանում, այն աճուրդով վաճառելու նպատակով մորից պահանջել է իրեն տրամադրել համապատասխան լիազորագիր: Մայրը չի համաձայնել, և որդին հենց այդ բնակարանում ծեծի է ենթարկել նրան:

Աբրահամին մեղադրանք է առաջադրվել ՀՀ քրեական օրենսգրքի 118-րդ հոդվածով: Նրա նկատմամբ որպես խափանման միջոց է ընտրվել չհեռանալու մասին ստորագրությունը: